AV moys de may Amour prĩt ses sa=
 gettes,

Pour venir veoir ses subiectz & sub
 (jectes

Dedans Paris, & toute la prouince,

Ainsi que doibt & veult faire vn bõ prince.

Luy arriué en sa cholere monte,

Car plus de luy dames ne tenoient compte :

Dont descocha son arc, dressant ses aesles

Contre plusieurs dames & damoyselles.

Pour mieulx tirer ses deux yeulx desboucha

Tout despité, mais son traict reboucha

Contre leurs cueurs, sãs faire playe aulcune,

Et s’il en feit ce fut seulement vne.

Il eut recours a ses ardens flambeaux,

Et leurs lanca par moyens fins & beaulx :

Mais quand du cueur vĩdrent saisir la place

Furent estainctz quasi plus froidz que glace.

Ce dieu voyant sa debile foyblesse,

Qui ne guerist plus les cueurs, ny les blesse,

Se retira (prins de douleur amere)

Conter le cas deuers Venus sa mere.

Qui luy respond, que sus Parisiennes

Auoyt perdu ses vertus anciennes :

Car pour leur dieu d’Amours & pour regẽt

Auoiẽt receu vn q̃ l[’]on nõme Argent.

Qui a muny leurs cueurs de fortes armes,

Pour abolir tous amoureux alarmes.

Ce faict ouy de sy grande importance

Precipité de dueil & d’inconstance

Ce ieune enfant hardy vint deffier,

Le nouueau dieu superbe, & tant fier :

Et luy liura (apres mainte querelle)

D’armes le choix auec guerre mortelle.

Mais cest Argẽt qui a l’homme impossibles

Rend a Paris maintes choses possibles,

Gaingna le camp, ruant Amour par terre,

Et le vainquyt par non pareille guerre.

Qui non content de si roide secousse

Luy arracha traictz, arcz, aelles, & trousse :

Et pour l’honneur de venus [sic pour Venus] la Deesse

Ne luy voulut faire plus griefue oppresse.

Doncq quãd Argẽt eut sus Amour victoire

Et prins captif dedans son territoire,

Il commenca a parler fierement,

Et le blasmer fort temerairement :

Disant ces motz. Garson plein de cautelle

As tu ausé par rigueur si rebelle

Me deffier : qui monstre par effect

Que faire puis le faict & le deffaict ?

Cil qui iadis desploya estandars

Contre ta force & tes amoureux dards.

Fut il si sot de vouloir tant mesprendre

Que sus mon droict s[’]efforcast entreprẽdre ?

Pour t’abolir sceust remede adresser,

Mays contre moy il n’ausa l’oeil dresser,

Cruel enfant conduict par promptitude

Congnoys tu poinct ta grande ingratitude ?

Ie te supply responds ce qu’il t’en semble :

Sceuz tu iamais ioindre deux cueurs ensẽble

Que ie ne fusse en cest accord compris,

Et pour moyen le plus apparent pris ?

Mais scauroys tu ce me dementir ?

Certes nenny, sy ne vouloys mentir.

Mes chenes d’or, Rubbiz & Diamans

Ont plus valu (pour iouir) aux amantz

Que tes fins tours, tes fleches, & tes arcs.

Aussi sont ilz trop plus vertueux arts.

Ie n’entends pas du tẽps que pour fleurettes

Humbles pasteurs iouissoient d[’]amourettes.

Petit trompeur de finesse la bonde

Qui as deceu & le ciel & le monde.

Tu as induyct Iupiter & les dieux

Icy descendre & delaisser les cieulx,

Et pour iouir d’humaines creatures

Prendre & vestir des bestes les figures.

Par tes flambeaulx & fleches venéneuses.

Maĩtz ont souffert tes ardeurs oultrageuses.

Les contraignant de iouster a oultrance

Dedãs tournoys dõnãtz grãds coups de lãce

Et assaillir villes chasteaux & tours

Pour seulement iouir de leurs amours.

Languir faisoys les pauures amoureux

Troys & quatre ans tristes & langoureux,

Mays maintenant par ma grande puissance

Sans les naurer leurs donne iouissance :

Et sy les puys tellement dispenser

Qu’ilz iouiront souuent sans y penser,

Car n’ont esguard dames aux gens hõnestes

Ny aux vertus prieres & requestes.

Mays il souffit pour auoir bon recueil

Qu’on ne presente au lieu de bon acueil

Vn laid quinault qui iamays n’auroyt veu

Et qui n’aura ny parentz ny adueu

En me liurant plustost en iouyra

Qu’un saige amant qui par tes arts ira

Et un varlet me donnant a congnoistre

Aura la dame aussi tost que le maistre.

Tu t’es iadis ioué des pauures sottes

Ainsy que font enfantz de leur pellotes

Tant les faisoys honteuses & secretes

Qu’on dict, c[’]estoient n’yaises [sic pour nyaises] indiscretes.

Car quand auoient a vn le cueur donné

Ne l[’]eussent oncq pour rien abandonné

Toutes estoient & iour & nuyct pensiues

De leurs amantz relisans les missiues

Et les faisant coucher auecques elles

D’ardant desir entre leurs deux mamelles.

Et les aymoient comme simples & nyces

Plus que ioyaux & fourreures de Nices.

Pour leurs amantz perdoiẽt boyre & mãger

Mettant leur vie en peril & dangier

Et enduroient tant de griefues douleurs

Que pour le moins portoiẽt palles couleurs,

Et toutesfoys par telz faictz inhumains

Contre leurs cueurs ont cõuerty leurs maĩs.

Et qui estoient belles & bien formées

En vile corps ont esté transformées.

Bien cher vendu leurs estoyt ton plaisir,

En les faisant de telle mort gesir

Leur ieu estoyt de composer epistres

Dont on en voyt en Ouide les tiltres,

Et perdre temps a lyre vn tas de liures

Qui les rendoient de tous plaisirs deliures.

Elles prenoient pour precieuses choses

De leurs amys vn chappellet de roses

Mays non apres de guerdonner remises

L’une donnoyt mouschouers & chemises,

L[’]aultre en fin or quelque riche deuise

La ou estoyt sa pourtraicture assise :

De telle erreur cause estoyt l’inscience

Faulte d’auoir des miennes la science

Et de n’auoir frequente [sic pour frequenté] leur escolle,

Ou la doctrine est de fruict non friuole.

Pour neant n[’]est dict, mays chose certaine,

Que Paris est de scauoir la fontaine.

Dont n’ont pas tord de t’auoir depose [sic pour deposé]

Et en ton lieu moy doulx prince posé

Du quel les loix doulces & naturelles

Ont confondu les tiennes tant cruelles

Qui a bon droict ont este [sic pour esté] reprimées

Et iustement les miennes approuuées.

En les gardant de bon & franc couraige

Myeulx que ne font [sont ?] la loy de mariage.

Ordonnance d’Argent.

EN premier lieu ie leur ay faict defense

De ne vouloir a leurs corps faire offẽse

Pour leurs amys cõme tes amoureuses

Mays en to⁹ tẽps soiẽt guayes & ioyeu
 (ses

En frequẽtãt festĩs, bãcquetz, & festes

Et que le dueil ne tourmente leurs testes.

Ie leurs permectz dormir toutes les nuyctz

Les dispensant ne prendre aulcũs ennuyctz

Pour mieulx traicter leur delicate chair

Sans poinct penser en amy tant soyt cher.

Et toutesfoys luy feront bonne mine

Car c’est le poinct qui plus le chetif mine

Dont payera les despens & amendes.

A leur coucher prendront vn laict d’amẽdes

Qui les tiendra fresches & bien disposes

Dedans leur lict entre courtines closes.

Sur le matin pour auoir le beau tainct

Qui se ternist la nuyct & le destainct

Humer pourront vn petit oeuf molet

Ou vn bouillon cuyt auecq’ vn poulet.

Puys se feront suer sus l’aureiller

En essayãt vn peu de sommeiller.

Ie l’eurs [sic pour leurs] ay faict autre commandement

Ne s’arrester a vn tant seulement

Et quand fera quelqu’un d’elles party

Qu[’]a l’aultre apres facent vn tel party.

Mays pas n’entends que les pauures & chi=
 (ches

Ayent acueil si humble que les riches

Car c[’]est raison de deferer honneur

A cil qui est le plus large d’honneur.

Et sy seront mes damoyselles fieres

A saluer honnestes gens fort fieres.

Consequenment que soient bien perfumées

Car pour cela en seront estimées

De plus hault pris & tousiours biẽ en ordre

D[’]affiquetz d’or & sans aulcun desordre

Car telz gluaux font duppes consommer

Et bien souuent de pauurete [sic pour pauureté] sommer.

Pource qu’il fault que le present consonne

Au riche habit & reluysant personne.

A soy farder auront eaux distillées

Ou quelque vnguent cõme sõ bien stillées.

Ie ne veulx pas oublier la pommade

Pour refreschir leur leure seiche & fade.

Pour apparoir gentes & sadinettes

Leurs corps seront estrainctz de cordelettes.

Dessus leurs yeulx yront cheueux au vent

Car cella dit. Cest icy qu’on les vend.

Les aduertir d’ordonner leurs mamelles

Sus l’estomach s[’]en fault fier en elles

Qu’elles scauront descouurir un petit

Pour proucoquer des hommes l’appetit.

Au temple iront, voyre pour muguetter

Leurs pingeonneaux qui la les vont guetter

Et soubz couleur de leurs deuotions

Entré eulx feront leurs assignations.

Bien ay voulu ainsi leurs commander

De non iamays se faindre a demander

A leurs mignons mesmes aux testes rases

Car par ceulx la seront riches leurs cases

Et mangeront de maintz friands morceaulx

Qui deuant eulx sourdent a grãds mõceaulx.

Sans ce, maris des dames ainsy graues

Ne les pourroient entretenir tant braues.

Auecq’ lesquelz i’ay d’accord conuenu,

Ne s’enquerir dont ie seray venu

Et par l’accord ne leur sera besoing

Des ioyaulx d’or & robbes auoir soing

En promettant qu’en tout temps & saison

L[’]on voise veoir la dame en sa maison.

Sy du mary l’amant a craincte ou doubte

Semblant fera ce mary n[’]y veoir goutte,

En le laissant auecq’ sa femme faire

Faignant d’auoir en ville quelque affayre.

Aussy apres il s’en trouuera bien

Car les gros frays ne luy cousteront rien

Quand porteront le dueil de leurs marys

Feront semblant d’auoir les cueurs marrys

Pour en siffler d’aultres a leurs pippées

Dont les amours sont par femmes pipées

Mays au couuert soubz ces blãches pelices

Continueront leurs plaisirs & delices.

Et sy entends que les adolescentes

Obseruent bien de leurs meres les sentes

Affin qu’apres en aage plus parfaicte

L[’]on dye c[’]est la mere toute faicte

Pas ie ne vueil qu’vne d’elles s’amuse

A lire esccriptz, car cela les abuse

Que sy quelqu’vn leurs enuoye vne epistre

Ou vn dizain, si ie ne suys en tiltre

Mutes seront, car ie vueil de par moy

Soyt l’introite en finissant par toy.

I’en scay assez qui scauent ce mestier

Mays les nommer il n’est point de mestier.

D’aymer tournoys & les vertus bellicques

Ie leurs deffends cõme vaines practicques

Car si l’un est pour elle, desconfit

C[’]est vaine gloyre ou n’y a nul profit

Qui est le blanc la au [sic pour ou] ie veulx que tendent

Pource q̃ scay ou leurs miẽs cueurs p̃tẽdẽt.

Apres seront en entrant en besoigne

En delaissant tout honneur & vergoigne

Par tous endroictz a prendre curieuses

Et a donner lentes & paresseuses.

Donner pourront une foys la sepmaine

Boucquetz de fleurs garniz de mariolaine

Ou aultre cas de petite valeur

Cas [sic pour Car] les grands dons ne portent que malheur

Mays pour leur biẽ ie veulxq̃ soiẽt venales,

En se vendant comme les bleds aux Halles,

Et qu’elles soient au baiser difficiles

Mays au deduict humaines & faciles

Ne refusant es festes & festins

A leurs oyseaux manier leurs tetins.

Et que pendant q’ua [sic pour qu’a] baler on s’esgaye

Es cabinetz prenent vne biscaye.

Pour couuerture auront quelque Matrone

De grauité qui conduira le trosne

Car de penser donra occasion

Que tout ce fait en bonne intention.

Sy quelque amy tant soit de bonne grace

Entre sans moy qu’on destourne la face

Et quand aulcun en sera despourueu

Semblant feront ne l’auoir jamais veu,

Combien que tous ses parentz & amys

Pour les aymer en arriere aura mys.

Et que dorez soient cabinetz & pleins

De ses presens dont apres sera plaintz.

Ie vueil aussi que sy leur honneur touche

Pour se vãger qu’on luy baille vne touche,

Et que ton nom hors d’vsance soit mys

Sans plus nommer par Amours leurs amys,

Mais par Argent pour l’honneur d’Auarice

Car ce surnom cõment a leur office.

Sçauroys tu doncq’ en rien me contredire

Que de no⁹ deulx il n’y ait trop a dire ?

N’ont elles pas le bien pour mal choisy

En acceptant le frays pour le moisy ?

Dõné leurs ay pour seruaige franchise :

Affin de viure a leur desiree guise.

Bien ont esleu la plus facile voye

Car sans ennuy auront toute leur joye.

Ne suis ie pas comme le feu a l’eau

Contraire a toy & plus doulx & plus beau ?

Parquoy bien tost pense te retirer

Allant ailleurs tes dards infectz tirer.

Tu ne feroys icy rien que morfondre

Sy par tes ars vouloys les miens confondre.

Retire toy es lieux sans longues poses

Ou tu as fait tant de metamorphoses.

Vat[’]en chercher Thisbée & Deiphile

Philis, Phædra, & de Minos la fille

Et ta Dido a qui feis ce bon tour

Quand veit sus mer Enee de sa tour :

Va visiter le cueur Penelopé

Ou si long temps tu fuz enuelopé

Et Portia ta loyalle Romaine

Que mourir feis de mort tant inhumaine.

Sinon vat[’]en trouuer pour le plus court

Chasté vertus & honneur en la court.

C[’]est la, c[’]est la ou tu te doibs tenir

Malheureux sort te feist ycy venir :

Car tu as cy mal desployé tes tentes

Pour y trouuer femmes sy violentes :

Va leur former ta piteuse complaincte

Que ta puissance en Paris est estaincte

Mays en premier de toy triumpheray

Et deshonneur de vaincu te feray.

Et si auray d’un nouueau dieu la marque

Pour en ton lieu estre mys en Petrarque

Dont ieunes gẽs & vieulx & beaux & laids

Sans excepter mecanicques & lays.

Puys qu’il a pleu aux dames me donner

Le lieu d[’]amours & de l’abandonner

Et que sus luy i’ay eu tel aduantaige,

Venez a moy faire foy & hommaige.

L’art de iouir maintenant vous enseigne

C[’]est que portez aux dames mon enseigne

Car poinct n’y a de plus belles ymaiges

Pour conuertir Parisiens couraiges.

Chacun de vous sera le bien venu

Et moy present le cher amy tenu

Mais sy perdez tant soyt peu ma presence

Vous serez mys du tout en oubliance

Laissez vertus, hõneur, dances, ballades :

Car ce les rend facheuses, & malades.

Sy ie ne suys au premier lieu posé

Et en presentz & banquets exposé :

Venez trestous ma personne conduyre

Sans plus vouloir a amour vous reduyre

Duquel vexez membres, espritz, & cueurs

Serez sans peine en mon signe vaincueurs.

Ce conquereur lors allant par les rues

De riches draps & dorures tendues

Pompeusement en char victorieux

Dedans Paris triumpha en maintz lieux

Du dieu d’Amours triste & humilie [sic pour humilié]

Trop rudement guarroté & lyé.

Et cela faict comme personne ville

Le pauure enfant fut banny de la ville.

A l’honneur d’une dame de Paris
honneste & loyalle

QVelqu’vn me dist quãd la nuyct feut
 venue

Qu’on l’auoit veu en l’ombre d’une
  (nue

Entrer dedans le logys d’une dame,

Qui a Argent donnoit merueilleux blasme

Vne apperceuz qui son dueil me celloyt

& croy qu’Amours chez elle recelloyt

Car digné [sic pour digne] elle est d’estre d’Amours, hostesse

J’entends d’Amours de vertus & saigesse.

Excuse aux honnestes & loyalles
dames & damoyselles de Paris

DE vous ne parle (Argẽt) hõnestes da=
 (mes

Desq̃lles sont sy p̃cieuses ames

Que ne vouldriez po⁹ toute sa richesse

Auoir le nom de femme pecheresse,

Qui guardez foy en loyal mariage

En esperant le promys heritaige.

Combien qu’ayez precieux ornementz

Riches ioyaulx parfumés vestementz

Chef apparent en toute honnesteté

Car cella n’est contraire a chasteté.

Et qu’il soyt vray i’ay la raison idoine

Que non l’habit mais le cueur faict le moine

Que sy Amour d[’]aulcunes est vainqueur

Tout cela vient de gayeté de cueur

Obstant qu’a mal estes assez éstranges

Mays pas n’auons priuilege des anges.

Argent n’a pas sus voz cueurs ce credit

De vous induyre a ce qu[’]il a predit.

Car ie scay bien qu’en q̃lque lieu qu’il aille

Vous l’estimez moins qu’n [sic pour qu’un] festu de paille

Ayant honneur tresbien recommande [sic pour recommandé]

Ainsi que dieu le vous a commandé.

Quand cest escript de luy sera party

En l’excusant vous tiendrez son party

Ie m’en fais fort & point n’en rougirez

Mays en vous cueurs ioyeulses en rirez,

Et sy direz qu’il a dict verité.

Par quoy de vous me srra [sic pour sera] irrité.

Ie ne dys pas que le veuillez ensuyure

Et ces beaux faictz & ordonnance suyure,

Mais vous direz que par certaines choses

A descouuert au vent le pot aux roses.

Ie pense bien que les brebis roigneuses

Ne seront pas en elles trop ioyeuses,

Et toutesfois ainsi comme vous bonnes

Qui bien montrez voz loyalles personnes

L’excuseront, car vne bonne amye

De son amy tel ne mesdyra mye.

Si d’Argent font iniurieuses plainctes

Quand se verront ainsi au vif bien painctes

Et qu’en leurs cueurs elles s’accuseront

Mais par dehors resfort s’excuseront

Il nommera par nom & par surnom

Celles qui ont de luy ce bon renom.

Dont tenir fault les langues en arrest

En delaissant le monstier ou il est.