[1]Et premierement,
Au Roy.

Puis qu’a plein poing tiens les cheueux

Du beau front chauue par derriere,

Ore-ore, encores mieux, tu peux,

(Et tu le peux bien si tu veux)

Tourner plus outre en plus arriere.

[2]Autre, au Roy mesme.

Roy belliqueux en cœur & corps,

En hauts faits-d’armes bien te plais:

Mais tandis entre les efforts

Ton sage esprit est bien recors

Qu’on fait la guerre pour la paix.

[3]Encores au Roy.

Ce grand Henry second-unique,

Illustre en race, en grace, en face,

Soit en loix du temps pacifique,

Pour grand bien de la Republique

(Qui tous autres grans biens surpasse)

Soit en hauts faits d’acte bellique,

Mille autres Roys passe & efface.

[4]A tresillustre & tresflorissant Prince
Monseigneur le Dauphin.

Si l[’]on fait cas de maints Dauphins de mer,

Ie feray cas d’un seul Dauphin de terre,

Que ia se fait aymer & renommer

Depuis Corsegue à l’humide Angleterre.

[5]Encores, à mondit Seigneur le Dau-
phin , & à Monseigneur le
Duc d’Orleans.

Rare est des freres la concorde,

Ce dit Ouide apertement:

Mais l[’]on ha tel contentement

En votre vnitè sans discorde,

Qu’Ouide escriroit seurement

Qu’elle est grande en vous grandement:

Car Phebus de sa quarte Sphere,

Dont il voit tout tresclerement,

Ne voit tel frere auec tel frere.

[6]A Monseigneur le Reuerendissime
Cardinal de Bourbon.

Y eut il iamais Cardinal

Si hautement tresnoble & bon,

Qui fust parangon, ou egal,

Au grand Cardinal de Bourbon?

[7]A Monseigneur le Reuerendissime
Cardinal de Vendóme.

Estre aymé, ce dit Iuuenal,

Des grans, n’est pas peu de louange:

C’est pourquoy, orné Cardinal,

A ton loz ma Muse se range.

[8]Au Roy de Navarre, & Duc de
Vendóme.

C’est un nom composé bien rare

Que le Vandomois-Nauarrois,

Qui de haut noble lustre pare

Ducs, Duchesses, Roynes & Roys.

[9]A Monsieur d’Anguyen.

Ta race en honneur extollee

Par faits de magnanimité,

Et par actes d’humanité,

S’est consacree, & enrollee

A la haute immortalité.

[10]A Monsieur le Prince de Condé.

Quand la viue vertu ouuerte

Par le monde s’egareroit,

Ie ne l’estimerois à perte:

En vous on la retrouueroit.

[11]A Monsieur le Prince de la
Roche surion.

Ton cœur en bien haut lieu aßis,

Comme Roche, constant & ferme,

En vertus en vaut deux fois six:

La Dame ailee ainsi l’afferme.

[12]A Monsieur de Montpensier.

Si ma Muse vers toy s’adresse

S’humiliant pour son deuoir,

C’est qu’elle ha enuie de voir

Et de saluer ta Noblesse.

[13]A Monsieur de Neuers.

I’espere que c’est à ton bon heur

Que i’honore maint grand Seigneur:

Or ie sçay que mes petis Vers

N’oubliront Monsieur de Neuers.

[14]A Tresillustre & florissant Prince
Monseigneur le Duc
de Lorraine.

De Noblesse & Vertu les traces

Sont en ce ieune Prince Illustre,

Luisant en biens, honneurs & graces,

En plein d’un beau naturel lustre.

[15]A Monsieur de Nemours.

Grande Noblesse, & grande humanité

En grand Seigneur sont bien iointes ensemble:

Grande prudence & animosité

L’une auec l’autre ici endroit s’assemble.

[16]A Monseigneur le Reuerendissime
Cardinal de Lorraine.

Ce grand Precesseur Cardinal,

Vray Mecenas, ami des Muses,

Te voit ià plus haut d’heur fatal,

Et non pas moindre, ains plus qu’egal

En grand’ faueur dont tu leurs uses.

[17]A Monseigneur le Cardinal
de Guïse.

Sous ce chapeau Cardinalin,

Dignité qui t’estoit bien due,

L[’]on voit plus cler qu’en cristallin

La pierre à son lustre rendue.

[18]A Messeigneurs les Ducs de Guïse
& d’Aumale, freres.

Soit à l’épée ou à la lance

Voici les Scipions de la France:

Soit pour bien garder une place

Deuant l’Imperiale face.

[19]A Monsieur le grand Prieur de
France, leur frere.

Tu es grand de nom, & de fait:

Il faudroit doncques en effet

Que ma Muse consequemment

Te chantast außi grandement.

[20]A Monseigneur le Reuerendissime
Cardinal de Ferrare.

Ce n’est ici premierement

Que i’ay ton haut nom salué:

Mais non encore assez loué:

Car qui le lou’roit deuëment?

[21]A Monsieur le Prince de
Ferrare.

Illustre en race paternelle,

Illustre en race maternelle,

Tu ne peux qu’Illustre ne sois

Par sang Italique & François.

[22]A Monseigneur le Connestable.

Louer ton nom i’attente & ie desire:

Mais c’est entrer en une Mer profonde:

Souuent i’y entre, & souuent m’en retire:

Puis y rentrant ie me suffoque en l’onde.

[23]A Monseigneur l’Admiral.

Qui n’admireroit l’Admiral

Quand Neptune mesme l’admire?

Et deuant lui, son general,

Maint Triton courant se retire.

[24]A Monseigneur le Cardinal
de Chastillon.

C’est un beau nom que Chastillon:

C’est un fort nom pareillement:

La Muse, en ce disant ne ment,

Chastillon est son bastillon.

[25]A Monsieur le Mareschal de
Saint-André.

Force & prudence sont ici:

Ici sont la force & prudence:

Bon heur y est par euidence,

Bon heur ioint à l’honneur außi.

[26]A Monsieur le Mareschal
de Sedan.

Il me desplaist que ta proësse,

Ainsi bien iointe à grand’ Noblesse,

Dont tu estois grand grandement,

À si tost pris deffinement.

[27]A Monsieur le Mareschal
de Brissac.

Ma Muse chante qu’il est deu

L’honneur à toy tant honnorable,

Qui à nostre Roy as rendu

Le peuple ennemi fauorable.

[28]A Monsieur le Mareschal
Pierre Strose.

Tu es renommé toute part

Non moins par industrieux art

Et longue experiense acquise,

Que de force en hauts faits requise.

[29]A Monsieur le grand Escuyer.

L’œil de ma Muse ha bien choisi

En cette Court, sans l’oublier

Ce grand Seigneur, ce grand Boisy,

Grand vertueux, grand Escuyer.

[30]A Monsieur le Cardinal de
Tournon.

Qui est cil qui ha par tout nom?

Cil qui un beau College dresse?

Cil vers qui Minerue s’adresse?

C’est le Cardinal de Tournon.

[31]A Monsieur le Cardinal de
Lixieux.

Ma Muse & moy auons les yeux

Sus la Vertu sans nul émoy:

Donq ce Cardinal de Lixieux

Honorerons ma Muse & moy.

[32]A Monsieur le Cardinal de la
Meudon.

Puis qu’Apollon m’a voulu faire

Cette grand’ grace, & ce beau don,

Ie ne les veux celer: ny taire

Ce bon Cardinal de Meudon.

[33]A Monsieur le Cardinal de la
Lenoncourt.

Qui est celuy dont le nom court

Par toute bouche, & par honneur?

Le mot le porte, par bon heur,

C’est le Cardinal Lenoncourt.

[34]A Monsieur le Cardinal de la
Giury.

Ainsi comme au dehors tu luis

En ce beau lustre Purpurin,

Autant au dedens tu reluis

En beau plus cler lustre Yuoirin.

[35]A Monsieur le Cardinal
d’Armignac.

Les Vertueux, & les Sauans

Vont file-à file deuers toy:

Tes pas & traces vont suiuans,

Comme l[’]on dit, mais ie le voy.

[36]A Monsieur le Cardinal
du Bellay.

Mais, ô ma Muse, oubliras tu

Ce grand sauant plein de Vertu?

Ce grand Mecenas renommé,

Et pour sa Vertu tant aymé?

[37]A Monsieur le Cardinal
d’Anebault.

Phebus dit que ce Cardinal

Fils du renommé Admiral,

Fils de l’Admiral renommé,

Sera par mes Vers bien nommé.

[38]A Monsieur le Chancelier.

Ma Muse des bons bien voulue

Voit luire en vous une constance,

Vne grand’ science & prestance,

Vne grand’ vertu resolue.

[39]A Monsieur Bertrandi, Garde des
seaux de France.

Phebus qui t’a esté humain

Te rendant santé douce & forte,

Par ce beau miracle il t’enhorte

Qu’aux Poëtes tiennes la main.

[40]A Monsieur d’Auanson President
au Conseil du Roy.

Ce beau nom qui est d’Auanson

Requiert un bien plus auant son,

Vn son de Muse plus hautaine

De Parisienne Fontaine.

[41]A Monsieur de l’Hospital, Maistre
des Requestes chez le Roy.

L’honneur de vertu & des Lettres

Toutes deux te donnans leur voix,

Font ton Nom luire entre mes metres

Comme il reluit entre tes Loix.

[42]A Monsieur le Vidáme de
Chartres.

Voicy l’amy de la Vertu,

De la Vertu iointe à Science:

Ma Muse, or sus, que luy fais tu?

Au moins fay luy la reuerence.

[43]A Monsieur de Saintgelais.

Tes Muses te caressent tant,

Que te dois contenter d’autant:

Et n’en sera ia plus notoire

Ton nom, ton renom & ta gloire,

Si à present ie te rameine

Par ebat vers cette Fontaine.

[44]A Monsieur Lancelot Carle, Euesque
de Rhiez.

De ton sauoir le bruit qui court

Par toute France, & par la Court,

Incite ma Muse, & ma Lyre

Te saluer: & ore elire

Ce petit traict du petit Charle

Pour voler droit à ce grand Carle.

[45]A Monseigneur Durfé, Cheualier
de L’ordre, & Gouuerneur
de Monseigneur le
Dauphin.

Quand Phebus m’aura echaufé

Echaufé plus que maintenant,

Ie chanteray ce nom Durfé,

Durfé aux bons la main tenant.

[46]A Monsieur le Grand Rapporteur
Fumee.

Ici sont la Muse & la Loy,

Ici sont la Loy & la Muse,

Deux grans seurs tousiours auec toy,

Dont ton haut cœur iamais n’abuse.

[47]A Monsieur de Termes, Cheualier
de L’ordre.

Ie te prendrois pour un Vlisse.

Sans flaterie & sans malice:

Soit que cette taille t’auise,

Ou cette langue bien aprise.

[48]A Monsieur le Comte de Tonerre,
Seigneur de Crussol.

Ce n’est du iourdhuy seulement

Qu’à ma Muse donnez louange,

Qui vous donna en contr’échange

Vn translat fait nouuellement.

[49] Aux freres dudit Seigneur de Crussol,
ayans Saliat pour Precepteur.

Ma Muse escrit, & chante apertement

Que ne pouuez sinon vertueux estre:

Ayans beau corps, & bon entendement,

Et puis außi bonne Mere, & bon Maistre.

[50]A Monsieur le Comte de Tande,
Gouuerneur pour le Roy en Prouence.

Ma Muse, il faut que tu entende

Saluer ce Comte de Tande,

Chantant tout hault que tu le comptes

Au nombre des vertueux Comtes.

[51]A Monsieur le Baron de la Garde,
Cheualier de L’ordre, & Ge-
neral des Galeres du Roy.

Par grand’ route de Terre & Mer,

Par grand’ route de Mer & Terre,

Tu as bien fait ton Nom semer

Des Thrace iusqu’en Angleterre.

[52]Au Capitaine Pierre Bon.

Souuent le fait conuient au nom,

Souuent au nom conuient le fait:

Que si quelcun doutoit que non,

La preuue en toy ores se fait.

[1]Et premierement,
A la Royne.

Royne en vertus, Royne en honneur,

Royne en royale progenie

Royne des plus grans biens munie,

Tu as le bon heur du bon heur,

Et les grans dons du grand donneur.

[2]Autre, à elle mesme.

Les cieux ne nous ont fait paroitre,

N’en plus d’honneurs & grandeurs croitre,

Vne autre Royne autant diuine

Qu’est cette Royne Caterine.

[3]A la Royne d’Escosse.

Voici la perle de tel lustre

Qu’Orient seroit ialous d’elle,

Perle sur diamant illustre,

Brillant en splendeur naturelle.

[4]A Madame Marguerite, Du-
chesse de Berri.

Ma Muse honnore en grand’liesse

L’humaine-diuine Deesse

Auant mort immortalizee,

Qui nous fait reflorir sans cesse

Des Muses le champ Elisee.

[5]A la Royne de Nauarre.

Ma Muse n’ha teu, ny peu taire

Ta Marguerite blanchissant

(La franche fleur resplendissant

De toutes fleurs bel exemplaire)

Ny cette fleur d’icelle issant.

[6]A Madame de Montpensier.

Mon penser est de Montpensier

Chanter par mes vers & ma prose:

Mon stile n’est pas si großier

Que bien ne le puisse & ne l’oze.

[7]A Madame Renee de France,
Duchesse de Ferrare.

Le tant renommé Roy ton pere,

Et pere du peuple, est loué

En hauts faits de guerre prospere,

Ou son cœur de vertus doué,

Par destinee estoit voué:

Mais toy d’autre vertu douee,

Par grand’ bonté tu t’es vouee

A toute douceur & clemence:

En quoy seras sans fin louee,

Duchesse, & royale semence.

[8]A Madame la Duchesse de Touteuille,
& Comtesse de Saint Pol.

Voyant toutes vertus ensemble

En la Dame de Touteuille,

Dame en tous hauts dons tant fertile,

C’est Pallas mesme, ce me semble:

Ou bien fort elle luy resemble.

[9]A Madame de Neuers.

Ie ne fay ne Prose ne Vers

Que ma double Muse ne tire

Mon affection, qu’elle aspire

Chanter haut l’honneur de Neuers.

[10]A Madame la Princesse de
Touteuille.

En cette Princesse on voit luire

Beauté, ieunesse, & tout bon heur:

Leur place ici viennent elire

Les trois Graces pleines d’honneur.

[11]A Madame la Duchesse
de Guïse.

La vertu, la beauté, la grace,

Le sçauoir, ici ont pris place:

Ce n’est pas ma Muse premiere

Aux vertus d’elle, & de sa mere.

[12]A Madame la Duchesse de
Valentinois, Diane
de Poitiers.

La grande Diane ancienne,

Grande Desse Ephesienne

Fut renommee & reclamee,

Et de maint Poëte clamee:

Mais la Dianne Francienne,

Dianne Saint-valierienne,

De la grand’ France tant aymee,

La surpasse ore en renommee.

[13]A Madame de Crussol, Comtesse
de Reindgraue.

Que faut il mes doigts trauailler

D’orner ton heureuse Noblesse?

Lignee, honneurs ioints à richesse

Tous les cieux t’ont voulu bailler.

[14]A Madame la Comtesse
de Tonerre.

Qui te dit vertueuse, il n’erre,

Ie dy vertueuse & constante

Contre le feu, foudre ou tonnerre

Qui sus ton Tonerre te tente.

[1] AV ROY, A LA LOVAN-
ge de la trefue, & pour la poursuite de la Paix.

Puis que ce Roy en grandeur admirable

Tenant en main Fortune fauorable,

Et adoré comme un Soleil leuant

(Soleil soulas de tout homme viuant)

Puis que ce Roy, grand Roy de la grand’ France,

Grand de renom, mais plus grand de puissance,

Veut rappeller l’Astree, & l’embrasser,

Et à ces fins ha fait desia passer

La belle Trefue en son char apparente,

Tiré d’espoir, portant table d’attente

Par toute France, & Martial Piémont,

Son peuple à ioye & repos il semond:

Peuple esperant qu’apres la messagere

Dieu nous donra la iouïssance entiere

De la grand’ Dame heureuse & trionfante,

Qui tous grans biens seule en ce Monde enfante.

[2]Au Roy.

Roy, fils de ce grand Roy de France,

Roy grand de nom & de puissance,

Pourroit ta petite Fontaine

Te donner suffisante etreine,

Quand te donroit plus que soymesme?

Ie di que non: mais, Roy supreme,

Mais ta largesse trouueroit,

Trop mieux dequoy m’estreneroit.

[3]Aus tresillustres Princes & Princesses de France.

Si mes dons & petis presens,

Que vous voyez ici presens,

Se presenter pour vos etreines,

Ne sont point d’etoffes hauteines

Ornez, enrichis, phalerez,

Diaprez, dorez, colorez:

Les Dieux reçoiuent des offrans

Les dons autant petis que grans:

Et par fois ont plus agreables

Les offrandes moins ostentables,

Venans d’un cœur deuot & dous.

Außi d’un poure homme à genous

Vn grand Prince reçut de l’eau,

De l’eau, pour present bien nouueau,

De l’eau qu’il porteit en sa main,

Tant fut ce noble Prince humain:

Et l’eau du donneur n’estoit sienne.

Receuez donques cette eau mienne,

Eau de ma fonteine Francique,

Ressentant de la Thessalique,

Et presentee par la Muse

Qui chanter vos noms ne refuse:

Mais qu’außi vous ne refusez

Luy changer ses habits usez.

[4]Encores ausdits Princes
& Princesses.

Si vos grans vertus honorees

Ie n’ay bien au vif remirees

De mes yeux non assez agus,

Außi ne suis-ie pas Argus

Ie ne suis Argus Courtisan,

Mais de cœur votre partisan.

[5]A la nation Françoise.

I’escri en François doucement,

Qui en Latin pouuois escrire

Plus amplement & doctement,

Leur langue est plus ample à vray dire:

La notre honorer ie desire

Comme ont fait les Latins la leur:

Leur nation n’est plus en fleur,

La notre s’en va florissant,

Et croist auec ce grand Croissant

Que nous produist le grand François,

(C’est mon double Astre ou que ie sois,

Et quelque part qu’il vienne ou voise.)

Mais ne somme nous pas François?

Notre langue est-ell’ pas Françoise?

[6]Encore à ladite Nation.

O forts François, nation belliqueuse,

Que dites vous? le cœur vous croist il point?

Quand la Fortune, estant victorieuse,

Vous rid si bien? ou (parlant mieux à point)

Quand le Ciel mesme est vostre de tout point?

C’est celuy seul qui au droit donne force,

Et qui les Francs & leur fort droit renforce:

C’est luy qui or’ ce Croissant fauorise,

Contre lequel trop vainement s’efforce

L’Aigle qui ha Plus outre en sa deuise.

[7]Au Roy.

Roy, qui n’as pareil que ton Pere,

Du cler Phebus amy prospere,

Fay que ma Muse droite & iuste

Te chante Mecenas Auguste:

Fay que ie chante que tu n’as

Rien moins d’Auguste & Mecenas.

[8]Au Princes & Princesses de France
& autres ses bons Seigneurs
& amis.

Bien que la mesnagere mouche

N’ait fait son miel dedens ma bouche

Ainsi qu’elle fit, ce dit on,

A ce ieune diuin Platon:

Mesme ce nonostant encore

Que, comme au bers de Stesicore

Le Roy des Chantres n’ait couché

Roßignolé, chanté, niché,

En mon berceau des mon enfance,

(Signe d’eloquente abondance)

Et que mon precepteur n’ait veu

Qu’il ait un blanc Cigne receu

Quand son disciple ie fus fait

Pour tendre à un art parfait:

Chacun de vous pourtant soit seur,

Que ma Muse n’est sans douceur,

Et que la vertu honoree

Sera par mes Vers decoree:

Si ce n’est bien eloquemment,

A tout le moins disertement

[9]A eux encores.

Si ma Muse ha, comme ie sens, puissance,

De viure, & voir longue postérité,

Vous en aurez la mesme iouissance,

Par votre Nom sur mes ailes porté.

[10]A Ioachin du Bellay, Pierre de Ronsard,
Estienne Iodelle, Baïf &
Oliuier de Maigni,
Poëtes.

Les vers Latins i’ay delaissez

Pour escrire en nos vers François,

Ou la Muse vous ha poussez.

C’estoit c’estoit aux temps passez,

Parauant ce grand Roy François

Qu’on brouilloit tout en Latinois.

[11]A Monsieur de Cheuriere.

Aller ne veux auant n’arrire,

Sans orner le nom de Cheuriere,

Nom de soy mesme bien orné:

Cheuriere est en toute maniere

A vertu & proesse né.

[12]A Monsieur de Pollienay.

Ton nom de ma Muse connu,

Ici sera graué & mis,

Afin d’estre le bien venu

Entre mes Seigneurs & amis.

[13]A Monsieur de Tyart.

Le grand sens & non petit art

Font haut renommer un Tyart,

Vn Tyart haut de nom, de fait,

Poëte & Orateur parfait.

[14]A Pierre de Ronsard, Poëte
du Roy.

Ne creins, ne creins, Ronsard, ce dous stile poursuiure,

Stile qui te fera, non moins que l’autre, viure:

Antre obscure & scabreux, s’il ne fait à blamer,

Si se fait il pourtant trop plus creindre qu’aymer.

[15]Au Lecteur.

Si ie fay de diferens Vers

Et mes Epigrammes diuers,

Le plus grand Epigrammataire

Les souloit bien en ce point faire.

[16]A un certain medisant
enuieux.

Tu dis mes Vers froids en couleurs:

Les tiens sont ils mieux colorez?

Tu dis mes Vers mal sauourez,

Mais tu n’en fais point de meilleurs.

[17]Raison de son voyage
à la Court.

Si les meres des oisillons

Par les buissons & les sillons

S’en vont là bechee chercher,

Pour l’aporter à leur fruit cher:

Qui est ce qui blamer pourra

Ma Muse, quand elle courra

Vers celle grand’ Court honorable,

Des Muses l’honneur, & la table?

Pour y rechercher cinq miettes,

Sauuans mes cinq de grans disettes?

Mes cinq petis, à brief parler,

Qui ne peuuent encor’ voler?

Mais quand, par temps, voler pourront,

Eux mesmes ils en chercheront.

[18]A Monsieur de l’Aubépine, Tresorier
de l’Espargne.

L’epine pique voirement,

Mais ce n’est pas donc cette ci:

Cette ci guerit meint tourment,

Et meint trauail & meint souci.

[19]A Iaques de Cambray, Conseiller, &
Aumonier du Roy, Chancelier
de Bourges & Ambassa-
deur en Trans-
syluanie .

Ton cler renom va bien auant

Auecques un lumineux ray

Luisant du Ponant au Leuant,

Par un lustre non faux, mais vray.

L[’]on entend ton beau nom Cambray

Louer, & aymer tout ensemble:

Mercure ha ta langue à l’essay,

Et ta barbe à Phebus ressemble.

[20]A Guillaume des autelz,
Poëte.

Apres tenir longues ou courtes tables,

L[’]on se recree aux cartes ou aux tables.

Mais le Poëte aux Vers tousiours s’amuse,

Et n’a plaisir sinon auec sa Muse.

[21]A Remi Belleau, Poëte.

Bon Ami, tu as un beau nom,

Et par ton Apollon renom:

Ton Nom conuient auec le mien,

Mon renom aproche du tien:

Car i’ay la Françoise Fontaine:

Tu as Bell’eau, bien viue & saine.

[22]Excuses à ses amis, & amis
de sa Muse.

Nul ne vienne ma Muse mordre

Touchant cette ordonnance ou ordre

Que ie tiens en mes Epigrames,

Escriuant aux Seigneurs & Dames.

A la Poétique maniere,

Qui soit deuant ou soit derriere

Ou en honneurs, ou en cheuance,

Ie n’en pren si grand’ connoissance.

[23]A P. de Ronsard.

A ta grand’ Muse industrieuse

Apollon donne autorité:

Dont ton euure laborieuse

Sur le fort temps victorieuse,

Viura en la postérité.

[24]A Iean Dorat, Lecteur du Roy
en l’Vniuersité
de Paris.

Ton Nom tout d’or reluit en France,

Reluit, treluit à suffissance:

Mais ton sçauoir plus que tout d’or

Te fait bien mieux reluire encor.

[25]A Monsieur du Parq, Historiographe
du Roy, estant malade
à Paris.

Fontaine aura tresbelle Etreine

Quand son amy retournera

En bon heur, & en santé pleine:

Mais ce pendant l’estrenera

De l’immortelle eau de sa veine.

[26]Au Lecteur.

Si ma Muse bien hault n’entonne,

I’emprunte bien peu de personne:

Et mes fruits sont bien recueillis

Qu’en mon iardinet i’ay cueillis.

[27]A Claude Laurencin, Seigneur
de Riuirie.

Ie te connois & reconnois

Pour bon vray Nestor Lyonnois,

Chanu de chef, de mœurs, & d’ans

Et bien rond dehors & dedens.

[28]A Monsieur le Lieutenant
Bryau.

Chacun voit, comme außi ie voy,

En vous trois grans couleurs ensemble,

L’honneur, la Vertu, & la Loy,

Loy qui au fin argent resemble.

[29]Au Chanoine Gauteret.

Deux ou trois ans Parisiens,

Et douze ou treize ans Lyonnois,

Nous trament ces beaux blancs liens

Que tu aymes & reconnois.

[30]A l’Ecuyer Caterin Iean.

Caterin reçoit mes pacquetz

Et mes lettres, non pas d’acquetz:

Caterin aura ce Quatrin,

Quatrin frais fait pour Caterin.

[31]Au Receueur François
Coulaud.

Peu parler, & bien auiser,

La vigilance en ton office,

Auecques prudence propice,

Sont les points qui te font priser.

[32]A Iean Seneton, & Iean de
Rochefort.

L’oncle & neueu sont double Fort

Qui se munit en double sorte

Pour defendre la maison forte

De Seneton & Rochefort.

[33]A Monsieur de Vens.

Eolus est Seigneur des Vents

Qui sont en nombre trentedeux:

Mais cure n’ha de luy ny d’eux

Ce Lyonnois Seigneur de Vens,

Qui prent tousiours en gré le temps:

Car pleuue ou vente, c’est tout un:

Auoir ne faut souci aucun

Des trente freres combatans.

[34]A Iean le ieune.

Ieune de nom, & ieune d’ans,

Mais meur de sens & bonne grace:

Prens ce Quatrein que ie te trace,

Car ton beau nom y luit dedans.

[35]A Marie Bourgeoise, petite fille
de cinq ans.

L[’]on dit Sapho Muse dixieme

Pour sa sçience en vers Lyrique:

Ie te diray la Muse onzieme

Pour ton bien chanter en Musique.

[36]Au Lecteur.

De mes Epigrammes le nombre,

S’il te fait ennuy ou encombre,

Et te charge la quantité

Quand en as leu, ou récité:

N’en ly plus que trois en effait,

Tu auras incontinent fait.

[37]Autre.

Entre les grans ie n’omets pas

Les noms de mes plus grans amis,

Marchans en sçience à grans pas,

Par grans labeurs non intermis.

[38]A ses amis.

Mes Vers d’etreines vont courans

Parmi les moyens & les grans:

Außi entend tout homme humain

Que l[’]on à cinq doigts en la main.

[39]Au detracteur.

I’ecri aux petis, ce dis tu:

I’enten qu’ils sont gens de vertu:

A ton sens, moqueur Democrite,

Vertu est donc chose petite.

[40]Autre.

Iadis un Roy mesloit bien sa vaisselle

D’or & de terre, & si la trouuoit belle.

[41]A Pierre Saliat.

Iamais ie n’auray oubliance

De l’amitié & alliance

Qui est honneste & vertueuse:

Y ha il chose plus heureuse?

[42]Autre à luy mesme.

Voy que ce grand faucheur refuse,

Mais ne sçauroit faucher ma Muse:

Muse non iamais assouuie

Du loz de l’immortelle vie.

[43]A quelque detracteur,
euuieux.

Chacun epigramme à part soy

Ce n’est pas grand cas quant à toy:

Veux tu un mot qui tranche & coupe?

Außi n’est-ce pas quant à moy:

Mais au moins valent ils en troupe.

[44]Autre.

Tu dis que mes Vers sont petis:

Ils sont petis, ie le voy bien:

Ils sont petis, mais c’est du mien:

Petis aulx donnent appetis.

[45]Autre.

Tu dis que mes Vers sont petis:

Tant plus tót les auras tu leuz:

Ils sont petis (di peu subtils)

Ils sont petis, mais non chetifs:

Ils sont petis, mais bien-voulus.

[46]A un sien ami, nommé
la Tour.

Chacun me prend, & me prendra

(Dit il) pour toy, quand me verra,

Car ie te ressemble tant fort:

Contre chacun ne fay effort:

Chacun fera comme entendra:

Chacun dira ce qu’il voudra,

Mais si ne suis-ie point si fort.

[47]A Iean Fournaud.

Ainsi que ie me pourpensois,

Comment feray-ie recompense

A ses Vers Latins? mes François,

En nombre six tout à la fois,

Et tout à l’heure que i’y pense,

Se presentent tout en presence.

[48]A I. Gohorri, & Cl. Gruget,
Parisiens.

Et le païs, & le sçauoir,

Dont vos labeurs sont vrays tesmoins,

Vos deux beaux noms vous feront voir

En un Quatrain: c’est pour le moins.

[49]Aux doctes Poëtes & Orateurs
en la langue Françoise.

Que me font Latins anciens?

D’eux ie tire profit aux miens:

Si les miens n’entendent Latin,

Profit y auront, bien matin.

Ie vous voy grans esprits de France,

Mettre la France en florissance.

Poursuiuez (sus, là, hardiment)

En Prose & en Vers viuement.

Notre langue n’est si barbare

Que dit un latineur ignare.

Plutarque dit: Chacun harangue,

Et escriue bien en sa langue.

[50]A Alexis Gaudin, Medecin
à Bloys.

C’est un grand cas que l’alliance

Faite en Vertu, & en science!

Tu ne m’as veu, ie ne t’ay veu,

Qui es des meilleurs biens pourueu:

Et si sommes bien alliez,

Et des meilleurs liens liez.

Außi ie t’ay veu par escrit,

Ie t’ay bien veu en mon esprit.

[51]A George de la Boutiere.

Quatre quatrains bons & ouuerts

Ne te sufiroient pas encores,

Quand ia la France tu honores

Et par ta Prose & par tes Vers.

[52]A Iean Citois.

Chacun n’a pas & l’entree & l’honneur

Que ie te voy pour bon commencement:

Apres l’honneur ensuit tousiours bon heur,

Au moins souuent, & plus communement.

C’est peu de fait d’auoir auancement

Si l’honneur est delaißé en mespris:

Cheris le donq: car naturellement

Il suit ceux la qui lui rendent son pris.

[53] I.C. Iean Citois à C.B. Lyonnoise.

Incessamment depuis ta connoissance

Espoir en moy, d’une amour pure & sainte,

A eu pour but ton honneste acointance,

Ne querant mieux: tu le sais: ce n’est feinte.

Ce doux maintien, auec de Dieu la creinte,

Ioint à beauté, dont ie te voy ornee,

T’ha de tout point, ô Pucelle bien nee,

Outr’exaltee en grand loz & honneur.

Ie tiendrois donq grande ma destinee

Si ie pouuois ATINDRE A CE BON HEVR.

[54]A elle encores, sur le commun
dire, que alliances sont
faites au Ciel.

Ie sçay fort bien que les Cieux ont infus

Cette vertu en l’Ambre & en l’Aimant

(Comme l[’]on voit) d’atraire fer, fetus,

Bien qu’on n’en sçait la cause proprement.

Garde n’auront toutefois bonnement

De s’acoupler, qu’un tiers ne les approche:

L’astre außi peu sert à deus s’entr’aymant,

Bonne amitié si premier ne les touche.

[55]Au Lecteur.

Veux tu sçaoir de Pucelle si gente,

Et de celuy qui meurt pour l’amour d’elle,

Les noms, surnoms, que (pour cause) ie cele?

Compris ils sont aux vers que te presente.

[56]A H.D.R. Lyonnoise.

Maints gens d’esprit osent prendre l’audace

De te hanter, pour entrer en ta grace:

Lesquelz tu sçais, d’un sçauoir moult prouide,

Tous contenter, sans que ton loz s’en change

Par mesdisans: & ne le trouue estrange,

Veu que tousiours RICHE VERTV TE GVIDE.

[57]A aucuns de ses amis, qui s’esbahis-
soient qu’il n’auoit esté
auancé par les
Princes.

I’ay des moyens (ie le say bien)

De rehausser mon petit bien:

Mais pour conclusion donner,

Ie n’ay le fait, ny le meintien

De flater, ny d’importuner.

[58]A un quidam, affermant que
le Soleil n’est essen-
ciellement
chault.

Le plus grand Ciel par son grand mouuement

Cerne le Monde en un naturel iour:

Lune & Soleil vont plus tardiuement,

Et chacun d’eux à part soy fait son tour,

Qui est diuers à ce rauissement.

Le plus hault Ciel, à ton sot iugement,

Vn accident ainsi violemment,

Deuroit trop plus donques luire & flammer:

Et pourroit bien, mouuant si roidement,

Tout l’Vniuers destruire & enflammer.

[59]A luy encores

Qui que tu sois, il ne m’en chaut:

Mais si say-ie tresbien un point,

Que Philosophe tu n’es point,

Niant que le Soleil soit chault.

[60]Encore contre cette folle
opinion.

Philosophie odieuse & nouuelle

Tu veux tenir, ô poure iugement!

Le Soleil ha, ce dis tu, seulement

Vne chaleur qui est accidentelle,

Acquise en luy par son seul mouuement:

Ie dy qu’il ha sa chaleur naturelle,

Et par effait nous la demontre telle.

Ne peut durer continuellement,

Si du subiet n’esteint l’essence belle.

[61]A un glorieux.

Tu veux l’honneur? il te fuira:

Ne le veux tu? il te suiura.

[62]A un grand corrigeart.

En tes euures n’ay point apris

La douceur que me veux aprendre:

C’est bien fait, quand tu veux reprendre,

Garde toy bien d’estre repris.

[63]A Iaques Pelletier.

Ton euure assez de louenge te donne,

Et ce flambeau par toymesme alumé

De tel honneur & splendeur t’enuironne,

Que Phebus dit qu’aurois trop presumé

Si ie pensois à ton Nom cler-aymé,

Donner clarté par la mienne alumette:

Ou faire un vers plus net, & mieux limé

Que ce beau vers de ta Muse tant nette.

[64]A Monsieur Philander.

Quand Vitruue retourneroit

(S’il faloit croire à Pythagore)

En ton corps il retrouueroit

Que son ame reuit encore.

[65]L’Auteur à sa chaste
Flora.

Si i’ay pouuoir de faire viure

Mon Nom, ainsi comme ie croy,

Mal gré commun mortel desroy,

Le tien viura, par le mien suiure:

Toy auec moy, moy auec toy.

[66]Autre.

Tu es Florie & de mœurs & de nom,

Tes mœurs me sont plus ordorans que bâme,

Ton Nom plait fort, ô fleur sans aucun blâme,

Tu floriras par eternel renom.

[67]Encore, d’elle
mesme.

Florie vingt mil fois me lie

En ses vingt mil laz d’amitié,

Qui, de vingt mil Vers anoblie

Par ma Poësie polie,

Reluira trop plus qu’à moitié.

[68]Ode, de sadite
Flora.

Depuis que le saint Ceste

Me ioint à mon Alceste,

Plus libre ie me voy:

Chanteray-ie pas donques

La liberté qui onques

Ne faut en elle & moy?

Liberté vertueuse,

Et non voluptueuse

Dont la fin n’est qu’esmoy:

Ie la chanteray ores,

Rechnateray encores,

Car chanter ie la doy

Macrin à la louenge

De sa Gilon se renge,

Et moy à ma Flora:

De qui la floriture

Ma Muse en sa peinture

Par tout demontrera:

Ma Muse libre chante,

Et Flora libre vante

Au saint lien d’Amour:

Duquel la ligature

Etroite libre, & pure,

Nous lasse tout autour:

Et sans lasser nous lasse,

Relasse & entrelasse

En mille enlassans las:

Car de telle enlassure

Qui libre nous assure

Iamais ne sommes las.

[69]L’Auteur à ses cinq Florons, qui
sont les cinq petis enfans de
de luy, & de sa
Flora.

Par mes cinq labeurs pouuez voir

Comme à bien ie vous veux induire:

D’obeïr faites bon deuoir,

Et bon deuoir feray d’instruire.

[70]Bonauenture du Tronchet,
à l’Auteur.

De tes Ruisseaux le cours tant gracieux,

Va coulant doux par notre heureuse France,

Y apportant certeine connoissance

Combien vers toy sont prodigues les cieux.

Chassant de toy le soing ambicieux

(Qui du vray bien forclot la iouïssance)

Tu vas chantant d’Amour la grand’ puissance,

Ses feuz, ses traits, ses faits audacieux.

On voit tousiours ta bouillante poitrine

En ta fureur, par ta Flora diuine,

Mettre en auant vos immortalitez.

Ie prie Amour, Amour qui nos cœurs lie,

Permettre ainsi que ma haute Thalie

Ayt par mes Vers ses honneurs meritez.

[71]A Apollon, pour ledit
Fontaine.

O cler Phebus, qui en cette Fontaine

Vas inspirant par ta force hautaine

Vn cours bruyant mille immortalitez,

Recompensant ses guerdons meritez,

Sois luy tousiours tant doux, & tant propice,

Qu’en exerceant dessous toy son office,

Pour un bon heur cent luy soient suscitez.

[72]Responses par l’Auteur audit
du Tronchet.

Pour un bon heur t’en soient suscitez mille,

Mil millions que tu as meritez,

Par ton Amour, & ta Muse gentille,

Mil millions de grans prosperitez.

[73]Au Seigneur Louïs des
Masures.

Ioye & douleur, contraires paßions,

D’un doux amer ont repeu ta docte ame:

Tes Vers plaintifs & lamentations,

Monstrent le dueil qui trop ton cœur entâme:

Ta lettre außi de Liesse ha le bâme,

Qui adoucit le coup de l’amertume.

Poëte amy, le Poëte l’[’]on blâme,

Qui tousiours trempe en triste ancre sa plume.

[74]Réponse à Charles Fontaine.

De Fortune ie ne me plains,

Ayant la douceur sauourée

Dont les Vers sont plains

En l’euure par toy labourée.

Ayant de toy receu encor

L’ofre de ton amitié bonne,

A moy plus precieuse qu’or,

Ny perle que l’Orient donne.

Cette amitié veux-ie extoller:

De qui l’honneur par moy s’entende:

Et si auant puisse voler

Que l’Uniuers tant ne s’estende.

A ton pris toute autre vertu,

Bien que (modeste) tu la cœuures,

Sonne plus qu’à l’airain tortu

Par les Muses, & par tes euures.

Ie prise donques l’amitié,

Present de grace singuliere:

Qui entre nous deux par moitié

Demeure à iamais familiere.

Pas ne bruiroit tant à demy

Le renom qui auiourdhui reste,

Sans la seure foy de l’amy

Qui de bon cœur suiuit Oreste.

Or puis que par le don des Dieux

Ie reçoy l’heur tant desirable,

Et que de mon nom studieux

Tu te rends à moy fauorable.

Par ta dextre, & la sainte foy,

Ie t’obteste & requier (Fontaine)

Que l’ofice & labeur de toy

Me donne quelque heure certaine:

Si qu’à l’imprimer de mes vers,

Dont en ton sçauoir ie me fie,

L’ordre se garde aux lieux diuers

Des points, & de l’ortorgrafie.

Sur les motz ne soit entrepris:

Les changer à nul il ne chaille,

Pour d’autruy n’usurper le pris,

Ou que par autrui ie ne faille.

Or tout à ta foy ie commetz:

Laquelle à mon secours i’inuoque.

En ce pendant pour tout iamais

Reçoy la mienne reciproque.

[75]De la mort de Iean Prunier,
Receueur de Lyonnois
& Forest.

La noire dame auec son dard

Ce grand Prunier ha abbatu,

Non tant par force ou par vertu

Comme par un traiturier art:

Car ce Prunier de part en part

Enraciné en bonne terre

Y tenoit bien fort, & bien serre,

Pour ne tomber si tót, mais tard,

Si n’eust esté la trahison

De celle Dame sans raison,

Mais plus tót furie orde & nue

Cachee souz la continue,

Qui l’ébranla, puis l’abbatit,

Mais maint reietton en sortit.

Ces reiettons, ô masque noire,

Tout malgré toy reuerdiront,

Et bons & beaux fruits produiront,

Dont sera la tige en memoire.

[76]Contre fortune bon cœur.

Si fortuna tonat, caueto mergi.

ODE.

I’ay veu le tems außi noir que la poix.

I’ay veu les vents desbridez & sans Loix,

I’ay veu, par fois, vents, tempeste & tonnerre

Arbre arracher, ruer maisons par terre.

Iusques aux cieux i’ay veu monter la mer,

Iusqu’aux enfers ie l’ay veuë abimer:

I’ay ce pendant veu la póure nauire

Qui çà & là, haut & bas tourne & vire.

Ma Muse iointe à la haute Vertu,

N’a point permis que fusse onq abbattu:

Plus haut qu’Enuie eleueray ma teste,

Guignant ça bas mer, vent, foudre & tempeste.

[77]Au Lieutenant Touchet
d’Orleans.

Ie n’ay amitié qui me touche

De plus pres, ami, que la tienne,

Bien éprouuee par la mienne

Ainsi comme l’or à la Touche.

[78]Au Secretaire Grauier

Si tu me porte amitié saine,

Cela n’est pas chose nouuelle:

Car, par la raison naturelle,

Le grauier porte la fontaine.

[79]A René Chandelier.

Vne prompte dextérité

Remplie de vertueux zele,

T’est une chose naturelle,

Naturelle en viuacité.

[80]A François l’Archer.

Hausse ici ton beau chef, ma Muse,

Et marche d’un pas plus hautain,

Pour saluer l’ami certain,

Qui iamais iamais ne refuse

De me voir, & d’ouir ma Muse.

[81]Contre aucuns par trop Se-
ueres censeurs.

Mes petits vers en stile bas

Que ma Muse voulut elire,

Sont les passetems & ebas

Ou ie ne puis ne me deduire:

Mais à qui donq peuuent-ils nuire?

Estre facheux? ou mal-plaisans?

Fors aux Stoïcs, que l[’]on peut dire

Graues, sourcilleux, & pesans?

[82]Autre.

Qui ha plus haut et riche stile,

Si l’admire, & le garde bien:

Mais au moins ne suis inutile

Ny chiche de mon petit bien.

Ce petit talent ancien

Que Dieu m’a donné, ie ne cache:

Si le talent nouueau ha rien

Meilleur, ie veux bien qu’on le sache.

[83]Autre.

Mais si feray-ie encores bruire

Cent traits de ma Muse Françoise,

Pour eblouïr, etonner, cuire,

À mon Censeur qui mes Vers croise:

Bien qu’à mon cœur son fait peu poise,

Ie sens ia renforcer ma Muse,

Dont la splendeur, ou que ie voise,

Me sera bouclier de Meduse.

[84]A Monsieur de la Source, Rece-
ueur de Lyonnois.

Ma veine par France coulante

Court vers vous sa petite course:

Car c’est bien chose conuenante

Que la fontaine ayme la Source.

[85]De trois siens amis Mede-
cins à Paris.

Quiconque est pres de ce grand Herebus,

Horrible & noir, à fin qu’il s’en retire,

Ne quiere point en la Grece Phebus,

Ni Machaon auecques Podalyre:

Ne voise aux prez, pour des herbes elire:

Mais quiere droit Fernel, Granger, Planson:

Qui feront plus, si l[’]on croit à leur dire,

Qu’Orpheus ne fit par sa forte chanson.

[86]A Pontus de Tyart, Maurice
Sceue, & Guillaume
des autelz.

Vos clers-vifs esprits bien ouuers

Montrent vos Proses & beaux Vers

En notre langue maternelle:

(Mais que ne dy-ie paternelle?)

Beaux Vers qui point ne tomberont,

Ains tousiours sur leurs piez feront:

Sinon que la langue Françoise

Tombast un iour en Ecossoise.

[87]A Monsieur de Iugerie Medecin
de Monsieur le Cardinal de
Lorraine.

La Muse ha un long souuenir

De l’amitié dont on luy use:

Et les tems & gens à venir

Lou’ront ton amour & ma Muse.

[88]Au Protenotaire de la Saulx.

Comme le saule, arbre utile & plaisant,

Se resiouit aux ruisseaux de fontaine,

Ainsi la Saulx, ami plaisir faisant,

Ayme & cherit ces beaux Vers de ma veine.

[89]A Charles de la Porte.

Quand ma Muse ses Vers vous porte,

Vous ne luy fermerez la porte:

Car c’est par la grace & le bien

Des Muses, que vous portez bien.

[90]A Bartelemi Teste.

Amitié demande amitié:

Bonne amitié tu m’as montree,

Et de moy ne l’as rencontree

Encores, sinon qu’à moitié:

Toutefois ma Muse s’apreste

Pour orner un iour cette teste.

[91]Au Tresorier Ferrier.

Puis qu’aymez donc ouir & lire

Mes Vers François, receuez or’

De cette Muse ce tresor,

Qu’elle vient tout nouueau produire.

[92]Au Seigneur de
Villette.

Qui dit que ma Muse valette?

Mais elle honore les amis:

Entre lesquels tu seras mis,

Orné du beau nom de Villette.

[93]A Iacques Dalechamps,
Medecin.

Tu marche auant dedens les champs

De l’immortelle Medecine,

Chassant maux les mortels fauchans,

Amy, & voisin Dalechamps:

Außi auec science insigne

Tu as une grace diuine.

[94]A Iean de Sylua, aussi
Medecin.

Suiuant la trace paternelle,

L’heur, & l’honneur qui sont en elle,

Tu ne peux qu’a tout bien venir:

A quoy te peuuent parfournir

Sauoir, ieunesse, & vertu belle.

[95]A ses vrays amis.

Les gens presens, & qui sont à venir

De siecle en siecle en heureuse affluance,

Auront un long un treslong souuenir

Que vous auez à ma Muse alliance,

Qui me mettroit plus tót en oubliance

Que cette amour qu’a elle & moy portez:

Et retenez ce seul mot à fiance,

Tous vos grans biens ne vous feront point tels.

[96]Le but de l’Auteur.

Puis que l’homme est de Dieu l’image,

En l’honorant i’honore Dieu:

Mesme quand maint grand personnage

I’honore, qui tient maint grand lieu.

[97]A Iaques de Cambray, Conseiller &
Aumonier du Roy, Chancelier
Bourges.

Par fois aux grans Seigneurs i’adresse

Quelques gentils petis quatrains,

Se haussans en leur petitesse

Iusqu’à hanter les plus hauts trains

De race & Noblesse hautains.

Sans se rabaisser, ou rabatre,

Par fois außi se font certains,

Que quelcun d’eux en vault bien quatre.

[98]A P. de Ronsard.

Nous auons perdu ton Brinon:

Perdu? tu me diras que non:

Car tousiours l’auons en memoire,

Qui ferons blanche sa mort noire.

[99]M. Chassagnon à
l’Auteur.

Par moyen de cheual Pegase

Vint la Fontaine Caballine:

Par moyen d’un diuin extase

Nous vient la tienne belle, insigne:

L’une est terrestre, mais diuine

L’autre voyons apertement:

L’une qui ha profondement

En terroir Grec, n’est mesprisee,

L’autre qui l’a diuinement

Doit el’ pas mieux estre prisee?

[100]Autre.

La Seine, en son eau bonne à boire,

La Saone, auec son pas douteux,

Auec son eau loing-courant, Loire,

Le Róne en son cours rioteux

Nous garde d’estre souffreteux

Des biens à nos corps profitables:

Si cela les rend honorables.

Plus d’honneur soit à toy, Fontaine:

Car de l’esprit les biens durables

Nous parfournit ta Muse humaine.

[101]Response par l’Auteur.

Pegase, Seine, Saone, Loire,

Et Róne roidement roulant,

Sont & seront bien en memoire

Mal gré le faucheur violant,

Et le siecle tousiours volant:

Mais quant à ma fontaine clere,

En sa Muse, qui luy eclere,

Par France long temps coulera:

Et par mon Apollon i’espere

Que d’elle & moy l[’]on parlera.

[102]A ses Bons amis, amateurs
des Muses.

Homere aueugle benissoit

Par ses Vers Grecs ses bons amis:

Par ses Vers außi maudissoit

Et coniuroit ses ennemis

D’un stile non láche & remis.

Archiloc fit bien le semblable,

Quand d’un stile agu effroyable

Contreignit Lycambe à se pendre:

Mais ma Muse ne veult pretendre

Fors à dire tout bien de tous:

Entre lesquels pouuez entendre

Que les mieux venus serez vous.

[103]Du bon vouloir & espoir de
l’Auteur.

Si Lachesis en mon endroit n’est lasche,

Ie parleray, aydant Phebus, ma tasche:

Tasche que i’ay pour Vertu entrepris,

Et qui aura sus mes euures le pris.

[104]Antonius Perardus ad Lectorem.

Fontani Musam mellitaque carmina, Lector,

Et quas huic vires Gallica lingua dedit,

Cùm bene gustaris, iure admirabere mecum:

Ac dices, vatis nomine dignus hic est.

[105]L’Auteur à Antoine Perard.

Ce nom Perard, amy Perard,

Me sent ie ne sçay quoy de hault:

Et l’equiuoque n’y deffault,

Car tout en toy se fait par art.

[106]Response par ledit
Perard

Quam mihi das artem, ni tu Fontane dedisses,

Fonti par poterat fortisan esse tuo.

[107]L’Auteur à Antoine Perard, &
à tous ses meilleurs
amis.

Si i’ay une simplicité

Auecques bien peu de parole:

Si i’ay par foys néceßité

Du bien mondain qui tost s’enuole:

Si iou’ray-ie si bien mon rolle

Que toute France m’entendra:

Et le plus Braue à mon école

Et dessous ma Muse aprendra.

[108]Ad Carolum Fontanum,
Io. Fournaudi te-
trastichon.

Te tua mortalem mater genuisse putabat:

Longius at viues Nestore, Carole mi.

Non, quæso, indocti cures ludibria vulgi,

Cùm placeas doctis, queis placuisse sat est.

[109]L’Auteur à son filz Iean
Fontaine.

Fay peu d’amis, & à loisir:

Tu en auras moins de plaisir,

Mais außi moins de desplaisir.

[110]Autre, à son petit filz Iaques
Fontaine.

Mon filz Iaques, le bien i’acqueste,

Qui par la mort ne perira:

Mon filz Iaques, fay moy donc feste,

Et puis ma Muse te rira.

[111]A Pierre Voeriot, lors
qu’il pourtrayoit
l’Auteur.

De ma plume le petit trait,

Amy, si tu me pourtrais bien,

Te rendra encor mieux pourtrait

Que ce doux trait du pinceau tien

Ne va trassant ce pourtrait mien.

[fin]Odelette.

A petit de frais s’entretient

Le Poëte en sa douce veine:

Et rien d’auarice ne tient

Cil qui ha le nom de Fontaine.

Trente amis trente blocs d’escus,

Raclans de leur extr’ordinaire,

Feroient reuiure leurs vertus

Ayans Poëte debonnaire.

Cent escus ils ne plaindront pas

En menus plaisirs & delices,

Qui seront apres leur trespas

Cent braues tesmoins de leurs vices.

Voyant les gens tant aueuglez

Apres le vice allans si vite,

Si deprauez, si desraiglez,

Volontiers me rendrois Hermite.

HANTE LE FRANCOIS.