B  ELLE de face, & gente de
 corsage,

  Et de maintien bien gratieuse,
 & sage :

  Depuis le iour que vey ton blanc
 tetin,

Par l[’]entrebail d[’]un collet de satin,

Quand nous estions semons de nopce ensemble,

Le plus du temps de iour, de nuict, me semble

Qu[’]en grand deduict tout dueil nous effaçons :

Et que te voy en toutes les façons

Comme ie t[’]ay esdicte nopces veuë.

Maint souuenir te presente à ma veuë.

Ie te voy cy en dansant maintenant,

A qui ie suis la blanche main tenant.

Par qui i[’]entends en bransle, en bassedanse,

Si iustement que rien plus, la cadence.

Tu vas si bien par mesure, & compas

Que quand tu fais, & compasses tes pas,

Ton corps, tes piedz, tes mains vont si bien d’ordre

Que menestrier n[’]y sçauroit par rien mordre.

Certainement bien souuent m[’]est aduis

Que deuant moy tu es tout uis à uis,

Et que le bransle auecques toy ie meine,

Te contemplant mieulx que de la sepmaine

Depuis le hault iusqu[’]en bas, puis souuent

Pour te donner au bas vn peu de vent

Leue du pied ta cotte bien doublee,

Sans que la danse en soit en rien troublee.

Tu m[’]en croiras, en tous endroitz, & lieux

Mille pensees viennent deuvant mes yeulx,

Lesquelz seroit impoßible d’escrire.

Comment pourroye en ce papier descrire

Qu[’]a la lueur de sept, ou huict flambeaux

Voy tes tetins qui m[’]y semblent tant beaux ?

Ton nez longuet, tes ioues vermeillettes,

Ton beau tainct fraiz plus que n[’]ont les fillettes ?

Ton large front, & ton col cristallin,

Außi le bort des leures courllin ?

Tes yeulx rians conduictz de telle forme

Que tu n[’]as rien sur toy qui te difforme ?

Comment außi mettroye en prose, ou vers

Que ie te voy les yeulx demy ouuers

Tourner uers moy, sans aucun semblant faire :

Qui m[’]y sembloient parler de quelque affaire,

A cil qui est de franc cueur escriuant,

Soubz grand espoir d[’]estre bien arriuant.

Pourroye dire, ou bien monstrer par signe

Tous les maintiens que mon Esprit t’aßigne ?

Comment ie te oy si sagement parler,

Que quand ta uoix est semee par l[’]air,

Mon cueur te dit auoir telle faconde,

Qu[’]au monde n[’]as premiere ne seconde.

Tu as le cueur si prompt, ioyeulx, & gay,

Que pour danser Pauanne, ou bransle gay

Oncques n[’]en vey vne de tel courage

S[’]en acquiter, sans perdre maintien sage.

Mesure tiens, auec ce, le corps droit,

L[’]affecion y est mise orendroit,

La grace y est, grace tant singuliere,

Qui me contraint dire qu’es la premiere,

En tant de biens, dont tu as bien assez.

En mon Esprit ces propos tant pressez

Sont nuict & iour, dix mille fantasies

Les lieux secretz, & places ont saisies

De mon cerueau, si que ne puis penser

Sinon que tu me uueilles dispenser

D’elles l[’]effect : à qui si ie plais en ce,

Fay que bien tost recouure ta presence.

Si ton œil vif, & de telle poincture

Qu[’]il perse cueurs tant que son regard dure,

Si l[’]esprit grand qui tous tes faictz regist

Si la beauté (Dame) qui en toy gist

Ne mentent point, tu es de doulceur plaine

Comme de fruictz en saison une plaine.

Si autrement (ce que croire ne puis)

Apres auoir repeu mes yeulx seduitz,

Ne veulx le cueur pareillement repaistre,

Mieux me vaudoit, mieux cẽt fois sans yeux estre.

Et s[’]ainsi est que ferme en rigueur sois,

Responds, pourquoy mon cueur si fort blessois ?

S[’]il n[’]a en toy support ny soustenance,

Que dit ton œil, que dit ta contenance ?

Que tu n’es rien qu’vne tentation

Dont la fin n[’]est que desolation.

Que n’es sinon qu[’]vn arbre de plaisance

Portant vn fruict amer de desplaisance.

Mais quand le feu couuert de ce beau tainct,

Iusques au cueur les regardans attaint,

Incontinent on iuge que la flamme

Te monstre auoir vn courage de femme,

Tel que ie quiers. Et pource amye entends

Que si tu veulx trouuer le lieu & temps

Dire ne peulx que trouuer ne le puisses,

L[’]on sçait assez qu’as tous moyens propices

Le lieu & temps furent le grand moyen

Qui assembla Heleine, & le Troyen :

Le lieu & temps außi moyen sera,

Qui, s[’]il te plait, nous deux assemblera.

Si ie voulois ta liberté toucher,

Qui en ce cas est vn bien le plus cher :

Si declarois de quelques gens l[’]affaire,

Tu ne deurois craindre de cela faire.

Si ialleguois le lieu propice tant,

Le lieu bien beau, & spacieux autant,

Si en auant mettois le voysinage,

Ne te tiendroit la crainte en son seruage :

Mais tout cela tu sçais trop mieulx que moy.

Reiette donc si tu as quelque esmoy,

Et ie ne croy qu’ayes crainte si grande,

Que par long temps te gouuerne, & commande

L[’]on dit que crainte est vne paßion,

Qui tost subiette est à mutation.

Qui craint ce iour, sera demain bien ferme.

Mais que me sert de faire long proces,

Pour enuers toy auoir meilleur acces ?

Ce n[’]est mon faict, ce n[’]est point ma coustume :

Donne congé si tu veulx à ma plume,

Amour de femme oncques ne m[’]a tenté

De la poursuiure oultre sa voulenté :

Car ce seroit manière de contraincte.

Mais puis que n[’]as l[’]affection estaincte,

Non sans cause est que pourchasse tant d’heur.

Peu parler fault à vn bon entendeur. 

EN reduisant en memoire ta grace,

Ton beau maintien, & ta luisante face,

Ie me suis mis à te faire lescrit

Que plus le cueur que la plume tescrit.

Tu le verras, mais en le voyant garde

Que homme viuant ne le voye, ou regarde,

Soit familier, soit sage, ou indiscret :

Non pas pourtant qu[’]il y ait grand secret :

Mais valent mieulx les choses tousiours seures,

Auec esgard de temps, de lieux, & dheures.

Car tel souuent se monstre familier,

Qui dit des maulx en derriere vn milier.

Te souuient il doncques de la iournee

Que te trouuay richement atournee ?

Cest vn des heurs plus grand quonques m’aduint.

Il y en eut des Dames plus de vingt

De grand beaulté, contenance, & sagesse,

Dont le regard faisoit vers moy adresse,

Qui comme toy ne naurerent mon cueur.

Estre ne peult de toy seule vainqueur.

Ie te voyois auec elles aßise,

Si bien parler dune façon raßise.

Ie te voyois (i[’]en ay bien souuenance)

Rire, & parler en bonne contenance.

Et quand quelcun deuers toy sadressoit,

Tant sagement le tien corps se dressoit

Le receuant dune façon humaine,

A celle fin que danser il te meine.

En quoy faisant n’es semblable à beaucoup,

Qui lourdement se leuent tout à coup.

N’a celles là apres qui les gens musent,

Ou par orgueil les laissent, & refusent.

A mon vouloir que telles on laissast

Tousiours cropir, de peur quon les blessast.

Tu sçais si bien en bransle, en bassedanse,

Comment le pied, & comment le corps danse,

Qu[’]on te tenoit de la danse le chief,

Soit à baisser, ou à faire relief.

En tel estat te contemplois adoncques,

Plus amplement certes que ne feis oncques.

Il ne suffit seulement de sçauoir

Quel au parler maintien on peult auoir :

Mais au danser cueur de femme s[’]espreuue :

Là le maintien, & la grace se preuue.

Là on voit bien qui se tient sagement :

Là vn chascun peult donner iugement.

Tantost apres deuers toy ie m[’]adresse.

Lors en doulx œil d[’]amoureuse caresse

Tu m[’]acceptas, sans delay, ne refus :

Dont fort ioyeux dedans mon cueur ie fus.

Non pas doubtant que femme me refuse,

Ie la rendrois trop plus que moy confuse.

Mais que tant plus auois à toy desir :

En ta caresse auois plus de plaisir.

Bien me souuient du beau lieu, ou nous fusmes,

Ou à l[’]entree vn si bon recueil eusmes,

Quand veismes l[’]huys vn peu entrebaillé,

Apres busquer, pouuoir nous est baillé

D[’]entrer dedans. O quelle grande chere

Là on nous faict ! vn chascun mect enchere

A qui mieulx mieulx, suruiennent metz sur metz,

De te seruir sur tout ie m[’]entremetz :

Et quand ce vint à presenter l[’]yssue,

En veismes vn le ventre au feu qui sue.

Apres les mectz partis deça, dela,

Chascun repeu, nous leuasmes de là,

Ayans bien veu les iardins, & mesnages.

Car vous sçauez que cueur amoureux nage

En nouueaultez. Mais partant de ce lieu,

En mon chemin ie vous fey mon adieu

De bouche, & plus de cueur, & de bon zele,

Disant en moy ce ha esté de par elle

Qu[’]au plaisant auons esté traictez,

Et qu[’]on nous ha si bons mectz apprestez.

Voyla comment feismes la departie.

Or ie voulant que tu sois aduertie

De mon vouloir, te fais mercis plus amples,

Que n[’]ont esté de bouche les exemples :

Et si veulx bien que saches que suis prest,

En bon amy de faire mon aprest,

Pour te traicter en la sorte & manière,

Non que m[’]as faict en la chere derniere,

Mais que pourra le mien petit pouuoir,

Quand te plaira. Adieu iusque au reuoir.

Si tu congnois le trauail, & la peine

Dont est d[’]amours la sente toute pleine,

Si tu entends mes maulx aucunement,

Ton plaisir soit me dire absolument

Ouy, ou non. Par response absolue,

Bien tost sera la question solue.

Le premier est gracieux saufconduict :

Le second est desdaigneux esconduict.

Par le premier on entend iouissance :

Par le second rigoureuse puissance.

Ò quand ie voy ta face, & regard d[’]yeulx

Tant attrayant, courtois & gracieux,

Comme ne puis de t[’]amour me deffaire :

Außi voyant ta manière de faire,

C[’]est que tousiours laisses le temps passer

Sans nul bon mot, ie me sens trespasser.

Ne declarant, soubz espoir qui domine,

L[’]aspre douleur qui sans fin mon cueur mine.

Tel bien souuent se monstre dru & sain,

Qui n[’]a repos, sur lict, ne trauersain.

Donc si tu as, ou es la medecine,

Ton bon secours le nauvré medecine.

Sans plus tarder, dy ie le veulx : sinon

Incontinent dy sans car, ou sy, non.

Car dequoy sert faire tant de menees ?

Tant de fatras, & tant de pourmenees ?

Tant deuiser, quand on ne vient au poinct ?

Tant requerir, quand on n[’]accorde point ?

Tant esperer, quand au bien on n[’]attouche ?

Trop tire en vain qui onc au blanc ne touche.

L[’]on doit sçauoir plus de gré d[’]un plaisir

Faict sans seiour, que quand par desplaisir

D[’]attendre trop, il est force qu[’]on sente

Dueil, & soulcy, tant que l[’]amant consente

Mourir soubdain, ou viure languissant.

Rends donc le cueur qu[’]as affoibly puissant.

Rends en santé celuy que tu affolles.

Rends au confus bonnes, seures parolles.

De proceder ne trauaille ma plume,

Car vraye amour cueur d[’]amans plus allume

Que les escritz : & oultre, le mandeur

Sçait qu[’]il fault peu à vn bon entendeur.

LA ou tu sçais, ie ne pris iamais aise,

Qui ne me fust destrempé en mesaise.

Car quel plaisir de pres voir, & toucher

Ce qu[’]on peult bien, mais qu[’]on n’ose attoucher

Pour esprouuer par pinceau, & par poincte ?

Combien que soit la bague riche & coincte.

Certes ainsi que dit mon iugement,

Cela n[’]est point vn vray allegement,

Ioye, ou plaisir : mais plustost fascherie,

Qui mesle peine en pensee marrie.

C[’]est seulement vn petit resiouyr,

Qui vient chasser plus oultre le iouyr.

C[’]est vn octroy qui l[’]esperant conforte :

C[’]est vn confort qui l[’]amant desconforte.

C[’]est vn beau feu, qui ha double chaleur :

C[’]est vn bon sort tout bordé de malheur.

C[’]est vn accord, donné par bonne guise :

Vne seurté laquelle se desguise.

C[’]est vn sirop que le medecin donne,

Pour alonger le mal de la personne.

C[’]est vn acces, à bien le calculer,

Qui faict d[’]autant qu[’]on est pres, reculer.

C[’]est vn vouloir dont l[’]effect est loingtain :

Vn asseurer, lequel est incertain.

A brief parler ce me fut plaisir souef :

Mais tout cela n[’]estanche point ma soif.

Voyla que c[’]est, tu n[’]estois pas loingtaine :

Mais ie mourois de soif pres la Fontaine.

Dont ne le fault compter pour passedroit.

La raison est, qu[’]on ne faict pas ce droit,

Qui est requis à bien esprouuer l[’]œuure.

Amye, or sus, par pitié ton cueur se œuuvre :

Luy seul peult tout faire bien prosperer,

Car c[’]est luy seul qui me faict esperer.

OMeschant sort, ô mauldicte fortune,

Qui pour auoir aymé ainsi fort vne,

M[’]as bien tenu l[’]espace de deux ans

Entre tes lacz tant durs, & mal plaisans !

Car si par fois aduenoit qu’a la trasse

Trouuois ma dame, ou que la rencontrasse,

Subitement par ta meschanceté

Tu me venois tollir ma liberté :

Si que n[’]osois compter mon cas à elle,

Ne luy donner à entendre mon zele.

Qui penseroit quel dueil ? quand à regret :

Adonc me fault tenir mon cas secret.

Plus voys auant, plus le zele augmente :

Tant plus il croist, tant plus il me tourmente.

Car on sçait bien que trop ardant desir,

Sans reueler, nous faict en dueil gesir.

Plus voys auant, plus croist ma hardiesse :

Plus elle croist plus ie sens de lyesse :

Car elle faict que ie propose en moy

Compter mon cas, & sans aucun esmoy.

Or il aduient que ie trouue ma Dame,

I[’]ay ce propos de luy chanter ma game.

Mais que fais tu, ô tresmalheureux sort !

Tu romps mon coup, car quand i[’]entre, elle sort.

Voyla comment tu m[’]es tousiours contraire :

Et que de toy ne puis aucun bien traire.

Mais maulgré toy tant ie l[’]ayme, & la sers,

Ie la querray & par champs, & par villes,

Et feray tant par tous moyens habilles

Que la verray : & si m[’]escoutera.

I’y parviendray, quoy qu[’]il me coustera.

SI par auoir sur toy ietté ma veuë,

Le plus du temps ton cueur dit, il m[’]a veuë,

De son costé le mien n[’]en dit pas moins :

Les coups de traict en sont les vrays tesmoings.

I[’]entends de traict, que l[’]œil tira adoncques

Tout droict au cueur, außi bien qu[’]on vit oncques.

Mais s[’]il aduient qu[’]on ne puisse tirer

Le traict dehors. ô Dieu quel martyrer !

O quel tourment ! ô quelle fascherie !

Car autrement ne peult estre guerie

La playe ainsi en cueur receuë. ô Dieux,

Mieulx ne vauldroit que l[’]hõme n[’]eust point d[’]yeulx ?

Que par iceulx en vn tel martyre estre,

Qui n[’]a relasche en la vie terrestre ?

C[’]est bien menty, c[’]est bien menty de dire

(Car à present les ose tous desdire)

Que Cupido ha les deux yeulx bendez,

Si que iamais ne luy sont desbendez.

Et mesmement que les deux yeulx il bende,

A toutes gens, lesquelz sont de sa bende.

Veu qu[’]il n[’]y ha ça bas plus cler voyans :

Ny plus au vif leur regard employans.

Ne voyent ilz sur Cheualier, ou Dame

Le moindre sy, qui face au corps diffame ?

Ne voyent ilz, & n[’]ont ilz bien notez

Le hault, le bas, le milieu, les costez ?

Ne voyent ilz tout soubdain, & à l[’]heure

De toutes gens le maintien, & alleure ?

Ne voyent ilz, mais ne nombrent ilz pas,

Secretement tous les bons, & faulx pas ?

Ne voyent ilz s[’]il y a rien qui face

Quelque beaulté, au corps, ou en la face ?

Le nez, les dentz, les yeulz, & les sourcilz ?

Ne voyent ilz les pensers, & soulcis ?

La ioye, ou dueil mesme que le cueur porte ?

Ilz voyent tout ainsi qu[’]il se comporte,

Et pour parler vrayement, & à poinct,

Plus cler voyans au monde n[’]y ha point.

Rien ne sçait donc, rien n[’]entend, & ne gouste,

Celuy qui dit, Cupido ne voit goutte.

Quand en vn cueur (qui bien petit apert)

Tire si droit, que tousiours il y pert.

Pareillement quand ceulx qu[’]il naure ainsi,

Ont l[’]œil sur tout iusques au moindre sy.

Apres que i[’]ay par trois, ou quatre fois

(Sans auoir eu response toutesfois)

Escrit à vous de franc cueur, & bon zele,

Ie m[’]esbahy de vous madamoyselle.

Que i[’]estimois, voyre entre toutes vne.

Mais qu[’]i ha il ? est ce quelque fortune,

Qui entremect d[’]escrire empeschement ?

Respondez moy, dictes le franchement.

Est-ce mespris, ou oubly ? ie ne pense,

Et ne croy point qu[’]il y ait oubly en ce.

Car que vauldroit sa promesse auanser ?

Quand tout est dict ie ne sçay que penser.

Voyla comment tousiours doubteux demeure :

En attendant quelque escrit qui m’asseure :

Lequel par trop est tardif à venir :

Ou ne l[’]ay peu encor veoir ne tenir,

Pour le seiour des porteurs, & grand pose.

Ie ne sçaurois que penser autre chose.

S[’]il n[’]est ainsi, voyez que fay deuoir :

Non vous le vostre : encor vous offre à veoir

Presentement la mißiue presente,

Comme si fust ma personne presente.

La raison est, ce que ma plume escrit,

Le prent du cueur qui premier le descrit.

Si donc en vous y eut de negligence,

Reparez là par bonne diligence.

Combien pourtant ie ne l[’]estime ainsi :

Mais que seroit plus tost quelque autre sy,

Que ie n[’]entends. Quand on ha faict promesse,

Quelque grand cas suruient si elle cesse.

Car nous n[’]auons (ô cueur que i[’]ay tant cher)

Que nostre foy, nous n[’]auons rien plus cher.

Par mes escritz vous pouuez bien congnoistre,

Ou que ie sois, que veulx de vous bien estre.

Et sans cela, cecy ne vous mandois.

Car que vauldroit de trauailler mes doigtz ?

Pour estre brief, amour veult, & commande

Que me offre à vous, à qui me recommande.

PAr cest escrit (Dame) ie ne pretends

De m[’]accuser vers vous, qui en tout temps

M[’]auez trouué prest à vostre seruice :

Et trouuerez sans mespris, & sans vice.

Ie ne pretends außi rentrer en grace,

Ayant commis vers vous crime, ou fallace.

Le seul penser de telle lascheté,

Crime seroit de lese maiesté.

Seulement donc ie veulx vous declarer,

Et par ces vers escrire, & auerer

Comme à grand tort de legere façon,

L[’]on ha trop eu sur moy faulx souspeçon,

D[’]auoir robbé vn chien à celle Dame,

Que veulx seruir, & sans fin, & sans blasme.

D[’]autant s[’]en fault qu[’]en faire, ou en penser,

Pour petit cas la voulusse offenser.

Ou est celuy, tant soit il inhumain,

Qui auansast sa maleureuse main,

Pour en rien nuyre à telle Dame honneste,

Ou pour rober le chien qui luy faict feste ?

La Dame en soy est de beaulté tant pleine,

Que la maintien vne seconde Heleine.

Digne pour qui on souffrist mille allarmes :

Et Roys & Ducz missent la main aux armes.

Elle ha außi auecques sa beaulté,

Conioinct amour, doulceur, & priuaulté :

Si gracieuse, & de si bon accueil,

Que mon grand bien seroit son riant œil.

Et ma perspnne estimois bien heureuse,

Quand me disoit en parolle amoureuse

Bon iour, bon soir. ô la bouche mignonne,

Ò œil friant, qui vie au cueur me donne.

Veu donc l[’]accueil que m[’]a faict, & l[’]honneur,

Serois ie pas trop plein de deshonneur,

De la vouloir par mon crime estranger,

Luy faisant pis qu’un barbare estranger ?

Luy tollissant ce que tant cher elle ha :

Le petit chien qui l’a tousiours suyuie :

Qui la congnoist mieulx que Agrus Vlysses :

Et la perdant n[’]a iamais les yeulx secz.

Le petit chien qui en son iappement,

Chante encor plus que Graucis doulcement.

Digne d[’]auoir (tant il est beau, & sage)

De Publius la chienne en mariage.

Le petit chien d[’]amour tant bonne & pure,

Digne d[’]auoir apres mort sepulture,

Auec la chienne (helas) de Atalenta,

Que le sanglier trop cruel adenta,

Digne d[’]auoir sa deploration,

Et sa louange, & decoration,

Auec l[’]oyseau de l[’]amye à Catulle :

Et perroquet que Ouide y accumule.

Mais que me vault purger de tel meffaict,

Veu qu[’]on sçait bien que ne l[’]ay iamais faict ?

Si ie l[’]ay faict, & commis telle offense,

Ie soys mengé des chiens pour recompense :

Deschiquetans tous mes membres menus,

Comme iadis Acteon, & Linus.

Or congnoist on par euidente yssue,

Qu[’]on ha sur moy opinion conceue.

A bien grand tort, & par trop faulsement.

Vous le sçauez (Dame) premierement.

Dame du cas, à qui la chose touche.

Dame du chien qui leche vostre bouche.

Que pleust à Dieu que ie disse außi bien,

Dame de moy, comme Dame de chien.

Vous l’auez donc recouuré Dieu mercy :

Le chien est vostre, & ie le suis außi :

Voire le suis, encor que ne vouliez,

Et qu[’]en rigueur tout au contraire alliez.

Vostre ie suis à vous faire plaisir,

Mieulx que le chien qu[’]auec vous voy gesir.

Belle pour qui à tort suis accusé,

Et toutesfois de nul suis excusé,

Fors de celuy qui seul congnoist les cueurs :

Ne voy tu point ie ne sçay quelz mocqueurs

(Car autrement ie ne les puis nommer)

Qui ton amant me viennent surnommer ?

Par vn seul mot donnans à nous deux blasme,

Qui mest bien grief pour toy honneste Dame.

Dea si i[’]estois vn mignon perruquet,

Plein de babil, & d[’]amoureux caquet,

On pourroit dire vn mot à l[’]auanture :

Mais gens qui sont d[’]une telle nature

Que sur autruy vont broquardant tousiours,

Et cintrouuant sur luy des meschans tours

Qui ne sont pas, & n[’]ont esté iamais,

Sont bien meschans. O bailleurs d[’]entremetz,

Qui n[’]espargnez ne voysin ne voysine,

Deussiez vous point estre gens de cuysine

Pour bien larder ? O langue mesdisante

Qui puis à l[’]un, puis à l[’]autre es nuysante,

Refrene toy. O voix qui soubdain vole,

Qu[’]as tu mesdit ! O parler trop frivole,

Qu[’]as tu semé ! soit imposé silence :

N[’]entreprens plus sur dame d[’]excellence

De qui les faictz sont si bien compassez,

Comme tu feis ces iours prochains passez

Dont le cueur nect nul mal onc n[’]y pensa.

Si celle là par qui recompense ha

Cil qu[’]on accuse à grand tort & sans cause,

Dame Raison, auoit ouy la cause

Par Verité nostre bonne aduocate,

Retireroit soubdain sa faulse patte,

Fol Iugement, L[’]aduocat aduersaire,

Ou plainement seroit trouué faulsaire.

Ie vous pry donc entre vous mesdisans,

Que n[’]allez plus ne si, ne mais disans

De ceulx qui n[’]ont merité deshonneur :

Car en la fin n[’]y auriez point d[’]honneur.

Et quant à toy, Dame, à qui ie rescriptz,

Ne crains en rien tous leurs blasons, & criz :

Quand les orras ie croy que viendras dire,

Vertu enfin vaincra vostre mesdire.

Pour resiouir mon cueur qui est tout tien,

Tu m[’]as escript en disant Amy, tien,

Tout est à toy, & ton commandement.

Mais quand on voit que ce qu[’]on mandement,

Et qu[’]il n[’]aduient ce que l[’]escript portoit :

Doubter on peult que mauluais rapport oyt

Le cueur qui tant s[’]estoit monstré humain.

Te souuient il que quand ta blanche main

Fainctement mis dedans la mienne dextre,

Dessus ta foy iuras, & promis d[’]estre

Tousiours loyalle amye deuers moy.

Maintenant donc pourquoy romps tu ta foy ?

Ah Cupido certes tresmal me prent

Que tu ne voys, car souuent on mesprent

Par ton bandeau enuironnant ta teste.

Et celle là qui monstroit cueur honneste,

Craindroit ton œil quand me dit en apert

Qu’elle m[’]aymoit, mentant comme il appert,

Et si seroit punie grieuement,

En tant que trop elle me griefue, & ment.

Helas, helas quel desplaisir ie gouste,

O Cupido, pourtant que ne voys goutte.

Que ne voys tu (respondz filz de Venus)

Les maulx ou sont maintz Amans deuenus ?

O moy heureux, si le moyen sçauoye,

O moy ioyeux, si le pouuoir auoye

De deslier de tes yeulx le bandeau,

Ie t[’]enuoyrois quelque epistre, ou rondeau

Pour te informer de son mauluais affaire.

Instruy moy donc qu[’]il me conuiendra faire.

Car ie languis en cueur, & Esprit,

Comme vn poisson qui languit, & perit,

Quand il perd l[’]eau, en laquelle il viuoit.

Quiconque soit qui en l[’]estat me voit,

Dit que ie suis trop plus mort que viuant.

Mais s[’]il te plaist tost seray reuiuant,

Belle, pour qui mon triste cueur lamente.

Et s[’]il te plaist que rigueur me tourmente,

En tel estat außi ie demourray,

Auquel en brief sans ton ayde mourray.

Que fay ie donc à Cupido complaincte ?

C[’]est à toy seule à qui doy faire plaincte.

Autre inuoquer, est trop grand mesprison :

Toy seule fais la playe, & guerison.

De me guerir ne fay donc point refus.

Achilles soys, ie feray Telephus.

VN iour ainsi que lun vient, lautre part,

En bon propos me trouuay quelque par

(Bien t’ay voulu cecy faire sçauoir)

Ou desiroit mainct vray amant te veoir.

Là fut de toy parlé en tout honneur :

Là vn chascun de loz t’estoit donneur.

Lun te disoit auoir biens de nature,

Qui surpassoient toute autre creature.

Lautre tenoit que nas pareille au monde,

Que nas en grace ou premiere ou seconde.

Brief, vn chascun sefforçoit de priser

Tes grands vertus quon ne peult despriser.

Tel loz tu as merité grandement,

Car de beaulté tu as abondamment

Certes trop plus quonques femme viuante.

Ioinct que ta main est tant bien escriuante.

Tu es Sappho en science haultaine :

Tu es en biens Iuno la souueraine.

Tu es Pallas en grace, & grauité :

Tu es Helene, ou Venus en Beaulté.

Les membres as tant proportionnez,

Quilz semblent estre à proportion nez.

Tant bien couuient le sein auec le reste.

Certainement ton visage angelique,

Rendroit ioyeux lhomme melancholique.

Tes yeulx sont clers, splendissans, & luysans,

A toute ioye & liesse induisans :

Si gracieux & benings de nature,

Que se depart, lors que ton regard dure,

Toute tristesse, & faict à ioye place.

Le plaisant tainct de ta luisante face,

Ton large front, & ton col cristallin,

Ton tetin blanc, quon voit soubz crespe, ou lin

Bien delié, ta leure rouge, & saine,

Dont vient, & prent son petit cours alaine

Tant souefue & doulce, & tes dorez cheueulx,

Ton corps bien faict, sans quon mempesche, veulx

Autant louer que poßible sera.

Mais qui le tout dignement louera ?

O grand beaulté, doulceur, & grace d’ange,

Ma muse est bien moindre que ta louange ?

SI ie tescry, ce nest pas sans raison :

Mais pour autant qu’a toute desraison

As donné lieu, tu verras cest escrit,

Que ma plume ha quasi par ire escrit,

Sur ce papier contenant ma fortune.

O malheureux quand i[’]ayme ainsi fort vne,

Qui nayme pas dune amour reciproque :

Dont dire peult, onc ne verray Cypre. Ò que

Peu discret suis, & tresmal congnoissant,

Que nen aymay autres, dont iouyssant

Ie fusse bien, qui me desiroient veoir,

Iaçoit quen moy de richesse, & dauoir

Nayent trouué, toutesfois bien ie sçay

Qu’elles ont faict par plusieurs fois lessay,

De mattrapper en leur retz, & cordelles,

Quasi m’offrans le cueur, & le corps delles.

Il est ainsi, ien suis tresbien records.

I[’]ay grace à Dieu santé en ieune corps,

Et suis tresbien de mes membres deliure.

Lunettes nay pour lire tout vn liure :

I[’]ay cueur ioyeulx. ie sçay trop plus que assez,

Que telz que moy ne sont iamais cassez

(Ie ne le dy pour me vanter) aux gages

De Cupido, lequel faict feux, & rages.

Si donc me veulx, ie te veulx bien : mais si

Tu ne me veulx, Ie ne te veulx außi :

Car autrement ie ne tay iamais quise,

Ny autre außi. Si i[’]ay ta grace acquise,

Ou que par trop leger de croyre fus,

Et maintenant tu fais de moy refus :

Remede quel ? Il fault que ie men passe,

Et que lestude, & les liures iembrasse,

Sans que de toy quelque si, ne car, ioye.

Ou il fauldra, si ie quiers autre ioye,

Que mon cueur (las) vers vne autre sadonne,

Qui son amour entierement me donne.

Ien sçay plusieurs, & si sçay leur hostel,

Dames dhonneur (dignes dauoir loz tel)

Dames de nom, qui à veoir me demandent :

Et quelque fois auec honneur me mandent.

Ie ne sçay pas si ie leur semble affable :

Mais certain suis que cela nest pas fable.

A quel propos te monstres tu si fiere ?

Ne pense pas que te aye par priere.

De tant prier ce nest point ma coustume.

Difficile est qu’a ce ie m’acoustume.

La grace à Dieu encor suis en ieune aage,

Quand le cueur gay en tout ioly ieu nage.

Ie suis encor en mon adolescence,

Lors que desbas on prent la congnoissance.

Ie suis encor (sans vanterie) seur,

Que de plusieurs puis estre possesseur.

Mais si tu veulx demourer mon party,

Mon cueur auras entier, & non party.

Ne veulx tu point me prendre pour partie,

Tout außi tost feray la departie.

EN attendant auoir de toy secours,

Le temps sen va, tousiours passe ce cours.

Sans y penser, nous dit à Dieu Ieunesse :

Sans y penser nous poursuit la Vieillesse.

Le beau Soleil tous les iours va, & vient.

Ieunesse va, mais iamais ne revient.

Et trop en vain en fin la regrettons,

Quand ses esbatz par trop nous reiettons.

Ieunesse donc (si tu men croys amye)

Et ses esbatz ne reiectons mye.

Assez aurons vieillesse rigoureuse :

Sans chagriner nostre ieunesse heureuse.

Ne pense pas que si ie ne taymois,

Ieusse esté tant de sepmaines, & moys

A te servir. Ou est ma recompense ?

De contenter Cupido veult quon pense,

Et toutesfois nullement y entends.

Ie tay si bien seruie, & si long temps,

Est-ce raison que suspens ie demeure,

Et quen langueur, sans mourir, tousiours meure ?

Long temps y ha que mas tenu soubz laz

Tant durs, que nay de toy aucun soulas.

Car plus ie prens à te veoir de plaisance,

Plus mon las cueur soustient de desplaisance :

Pource que plus de iouyr il sefforce :

Plus on luy dit que dattendre cest force.

Tu mas nauré, & tu me peulx guerir :

Trop cruelle es, si me laisses perir.

Quand Cupido en vn cueur amour ante,

Telle personne en langueur va mourante,

Si le iouyr trop tard luy est permis.

En cest escrit ie lay comme expert mis.

Car Cupido par toy ma trop nauré,

Et en ce faict y ha si bien ouuré,

Que i[’]ayme plus ta grace, & ta manière,

Que ie ne fay dor ou dargent miniere.

I[’]ayme trop plus ton gracieux maintien,

Que mesmement des autres lentretien.

Plus me reuient ton bien formé corsage,

Que dautre, tant soit belle, ou encor sage.

Ta doulce voix, ton parler femenin,

Me semble plus que tout autre benin.

Dame ny ha tant soit de hault lignage,

Deuers laquelle mon Esprit nage

Comme vers toy. Ce nest donc merueille,

Si le mien cueur à toy seule aymer veille.

Qui est celuy qui est exempt daymer ?

Ie vouldrois bien quon me le peust nommer.

Qui est celuy qui nayt faict quelque amye ?

Ie croy que tel on ne nommera mye.

Antoine Marc ayma Cleopatra :

Zenone ayma Paris, dont elle entra

En grand douleur quand Helene il rauit.

Le painctre grand, Campaspé nue vit,

Et fut damour, & dardeur entasmé.

Pyramus ha iusques à mort aymé,

Thysbe außi, tesmoing leurs glaiues nudz.

Le traict damour, le brandon de Venus,

Ont bien senti Ero, & Leander,

Qui ont voulu des epistres mander :

Et qui sont mortz en poursuyte amoureuse,

Noyez en mer horrible, & furieuse.

Les dieux haultains mesme ont cure daymer.

Quil soit ainsi, Neptune, Dieu de mer,

Nayma il pas Tethys ? ouy en effect.

Mars & Venus on ha prins sur le faict.

Et Iuppiter ayma Leda, en signe

Quil se mua pour elle en vn blanc Cigne.

Phebus ayma Leucothee, & Daphné :

Dune iouyt, lautre la pourmené :

Mais lune & lautre est en arbre muee,

Lune dhonneur, lautre dodeur ornee :

La Lune ayma de grand affection,

Iadis le beau pasteur Endymion,

Et lendormir sept ans : adonc le baise

Incessamment, & trop plus à son aise.

Tu entends donc que le train damours suyuent

Mesme les Dieux, que les Hommes ensuyuent.

Si i[’]ayme bien, i’ensuys des Dieux la Loy :

Ce ne sera honte, ou reproche à moy.

DE te rescrire abstenir ne me puys :

Car tant rauy en ton amour ie suys,

Que me contrainct ma pensee secrette

Te declarer que souuent te regrette.

Et te dira lescriture presente,

Que bon amour si fort te represente

Dedans mon cueur, que sans ton souuenir,

Iamais ne puis ou aller ou venir :

Car mon Esprit tousiours y continue :

Et de ce mal doulce est la continue.

Par grand desir ie te voy pres de moy :

Pourtant ny es, qui me rend plain desmoy.

Puis ie te voy facondement parler :

Ta doulce voix prendre son cours par lair.

Rire, chanter : comme tu te maintiens,

Auecques beaux & gracieux maintiens.

Aller te voy, danser, asseoir tes pas.

Et toutesfois (qui mest grief) ny es pas.

Souuent aduient que ce que lon desire

De cueur feruent, se vient au sens produire :

Si que fust on en lieu distraict, ou voye,

Tel comme il est il semble quon le voye.

Ainsi me sont ces pensemens venus.

Et si tu quiers qui faict cela ? Venus.

Venus ne veult amans estre loingtains,

A fin quilz soient lun de lautre certains.

Venus le cueur de lun à lautre change :

Venus iamais ne veult que lon sestrange.

Ie vy en toy, & en moy mesme meurs.

Tant mest à gré ton maintien, & tes mœurs,

Que mon cueur prent dedans toy sa racine,

Et que seras sa vie, & medecine

Tant que lamour iusque à mort estincelle :

Qui ha tousiours bien entretenu celle,

Que i[’]ayme seule, & qui me faict valoir :

Qui ha mon cueur du tout à son vouloir :

Et luy escrit regrettant sa presence

Se trouuant mal, tresmal en son absence.

Or sil te plaist changer lennuy en ioye,

Amye fay que dans brief terme i’oye

Bon mot de toy, sans lequel ie peris :

Car exposé me voy à grands perilz.

Ie nescry pas pretendant ton reuoir.

Ly donc la lettre, & prens en bonne part

Laffection du cueur dont elle part.

DE trois regretz mon cueur fut surmonté,

En delaissant (Dame) vostre Cité.

Vostre Cité, helas, & cest le poinct,

Vous y tenez, & ie ne my tiens point.

Cest le premier des trois regretz en nombre,

Et le plus grand, qui tient mon cueur en vmbre

D’ennuy fascheux, dont procede vn soulci,

Vn pensement, & vn souspir außi.

Non sans raison, & bien grande apparence,

Quand loing de vous ie fay ma residence.

Secondement i[’]ay vn autre regret

De la Cité, lequel est moins secret,

Cest asçauoir pour le terrain, & cloistre :

Et ce regret vient le premier accroistre.

Le tiers regret cest que de ce Palais

Auquel ie hante, à cause de ces plais,

Plus pres serois, & plus en cueur de ville.

Ie suis en lieu, & en rue plus vile,

Peuplee moins, & sentant mieulx ses champs,

Ou ne voy tant de sortes de marchans.

Et dessus tout (Dame) ie ne ty voy.

Dame que i[’]ayme autant, ou plus que moy.

Ces regretz donc me griefuent : mais en somme

Le premier seul tous les autres consomme.

Lequel regret si au long ie poursuys,

Certainement assailly de peur suis,

Et si croy bien que main, & plume ensemble

Nen escrivoient la moytié ce me semble.

Quand mon Esprit se y vouldroit bien offrir

Plume, & papier ne le pourroient souffrir.

Car ce regret est de telle nature,

Quil ne se peult comprendre en escriture.

Ie ne voy point meilleur contentement,

Que le laisser à vostre pensement.

Or à Dieu donc, à Dieu, à Dieu ce dy ie

Incessamment, car amour my oblige.

APres que i[’]ay bien veillé, & nay peu

Aucunement vous trouuer à temps deu,

Pour vous bailler vn petit mot de lettre :

Dame, croyez que suis contrainct de mettre

La plume en main pour vous faire sçauoir,

Que de ma part ien ay faict mon debuoir.

Pareillement pour despiter Fortune,

Qui ne nous donne aucune heure opportune.

Car ie pretendz par ces presens escritz,

Vous declarer mes souspirs, & mes cris

Dont fus serui en cueur, & en pensee,

Incessamment la sepmaine passee.

Et tout ennuy quand il est reuelé,

Ne nuit pas tant que quand il est celé.

Le cueur humain s’allege, & se soulage

Se descouurant à quelque personnage.

Mesme au besoing (sil se sent trop charger)

Sur le papier il se peult descharger.

Cest ce qui faict quencore vous escriue,

Et que pour vne aurez double mißiue.

Mais que Malheur tant ne me vueille oultrer,

Quon ne vous puisse à heure rencontrer.

Qui me seroit vn renfort de mesaise,

Dequoy mon cueur ne seroit iamais aise.

Ce me seroit vn si aspre rengrief,

Quil nen fut onc, ce croy ie, de tant grief.

Premierement Dame, damour entiere,

Quand le maintien, & grace singuliere,

Qui sont en vous ie vy, & apperceu

Grande lyesse en mon cueur ie receu.

Et m’en croyez que plus que de ma vie,

Senty en vous ma pensee rauie.

Puis vostre ris, vostre parler courtois,

Me plurent tant, que quand vous escoutois

(Combien que nous eusmes peu de parolle)

Vous estimois le chef de la Karolle.

Le doigt preßé, & les genoulx frayez,

Les traictz de lœil franchement octroyez,

Du bout du pied la cotte soubzleuee,

Ioyeusement en manière priuee,

Le bon maintien de corps, & de visage,

Le cueur dehait, le corps droit maintenu,

Le rond tetin vmbrageux, demy nud,

Me faisoient dire, & sans oultrecuydance,

Femme de cueur est ceste cy qui danse.

Mais qui pourroit ainsi comme ientends,

Le plaisir dire, & le grand passetemps,

Que ie prenois en vostre œil damour pure,

Auant la danse, ou quand la danse dure ?

Mais qui pourroit, ou escrire, ou penser

Ce que depuis ien ay peu pourpenser ?

Cueur conuoiteux se delecte, & se baigne,

Alors quil faict mil chasteaulx en Hespaigne.

Ie ne veulx donc tant hault philosopher,

Iyamerois mieulx sur le faict meschauffer.

Las quantesfois le iour ie me transporte

Soir & matin, iusques à vostre porte,

Pour recreer mes yeulx (qui m’est grand heur)

Vous le sçauez que ie ne suis menteur.

Et ma personne y auez aduisee,

Souuent iettant dessus vous sa visee.

Lors ie me sens damour tant detenir,

Que ie ne sçay quel maintien doy tenir.

Ie voys, ie viens, tout soubdain ie destourne,

Puis ie reviens, ie marche, ie retourne,

Qui faict cela ? sinon que mes espritz

Sont plus que trop de vostre amour espris ?

Par vn long temps lamour point ne se cele.

Le feu caché en la fin se descele.

Le feu que sens est feu chault, cler, & beau :

Cest asçauoir de Venus le flambeau,

Qui tousiours luyt, & long temps ne se cache.

Ha vostre cueur nest pas qui ne le sache.

Luy plaise donc espandre tant soit peu

De leau de grace au milieu de ce feu,

Dont par vostre œil qui sur moy estincelle,

Mauez ietté la premiere estincelle.

MOn bon Seigneur par deuers vous iadresse

Lescrit present, que ie fay, & ie dresse

En Elegie, & forme de complaincte,

Que verrez cy comme en vn tableau paincte :

Sur le depart de ma bonne maistresse,

Qui ma remply de tel dueil, & tristesse,

Et tant saisi le cueur de son absence,

Qu’encor sen deult regretant sa presence.

Si ie me plains (las) ce nest pas à tort :

Car i[’]ay assez souuenance, & record

Que ce pendant quen ce lieu de plaisance,

Madicte Dame y faisoit demourance,

Lon y trouuoit & dedans, & aux portes

Honnestes gens, voire de toutes sortes.

Musiciens de bonne, & viue voix,

Ioueurs de Lucz, de Flustes, & Haultboys :

Et maintenant seul icy ie demeure.

Que dy ie icy ? Mais ie suis à toute heure

Auec ma Dame, & ses gens, & si voy

Mon Seigneur preux au seruice du Roy.

O triste lieu, ô lieu de Glatigny,

Que tu estois bien paré, & muny

Dhonneste gens, humains, & gracieux !

Mais tu lestois encore cent fois mieulx,

Ou mille fois, mille fois sur mon ame,

Tant seulement par ta maistresse, & Dame.

Dont la presence à toy fauorisoit,

Si que sur tout ta valeur on prisoit.

Elle sembloit vn Soleil splendissant,

Qui te rendoit bien souef, & florissant.

Et de present qu’elle sen est allee,

Me semble veoir grand nue deuallee

Droit dessus toy, espandant neige, & gresle.

Dont sans cesser mon cueur dit, ou va elle ?

Reuien, reuien Soleil plaisant, & beau,

Reuien produire icy un temps nouueau.

Ne suffist il que Monseigneur, & maistre,

Soit tant souuent esloigné de cest estre,

Sans que ce lieu tu laisses à autruy

Vuide de toy, & tout comble dennuy ?

Ha mon penser du tout faulx na esté :

Car nous auons eu yuer pour esté.

Helas, helas, depuis quelle est allee,

Nous auons eu vne froide gelee,

Qui ha meurdry maintz beaux bourgeons petis,

Mainte florette, & maintz boutons gentilz.

Ainsi chantoit ces tristes vers ma muse,

Quand dur regret la detient, & amuse.

Mais tout soubdain m’oyant chanter cecy,

Glatigny vient à me respondre ainsi.

Dea Recepueur qui en voix haulte, & forte

Si fort te plains, fault que te reconforte.

Il est bien vray quelque cause il y ha

Pourquoy ton cueur se melencolia,

Et fut saisi de regret, & destresse

Sur le depart de ta Dame, & maistresse,

Et mienne außi, que Dieu gard, & benie,

Pareillement sa noble compagnie.

Mais son depart, qui tant te picque, & mord,

Est iuste, & bon, non par force, ou par mort.

Elle sen va, pour le sien espoux veoir,

Et auec luy quelque repos auoir.

Elle sen va (grace à Dieu) gaye, & saine,

Ou bonne amour la transporte, & la meine :

Elle sen va, non pas sans retourner :

Dieu nous la vueille à santé ramener.

Si tu ten plains combien plaindre men doy,

Qui suis à elle au parauant que toy ?

Tu as icy boys, riuieres, prairies,

Arbres fruictiers, & vignes bien fleuries :

Tu as ta femme, & seruante, & valet,

Ne te plains donc que tu sois tout seulet.

Tu m’as außi, qui en vaulx plus que quatre,

Auec qui doibs passer temps, & tesbatre :

En me faisant (sans vn iour delayer)

Tantost faulcher, puis fenner, puis seyer :

Et autres cas, & plus de mille affaires

De ton estat, qui me sont necessaires.

Cela faisant (comme sans y penser)

Tu sentiras ton desir auanser :

Et tost verras (le Ciel faisant son tour)

De ton Seigneur, & Dame le retour.

Lhomme occupé iamais il ne sennuye,

Face chault, froid, face vent, face pluye.

Quant aux bourgeons qui sont endommagez,

Le froid en ha quelques vns vendangez :

Mais non pas tous : ains nous en faict reserue

De plus grand part, que Dieu garde, & conserue.

Et dauantage, ou ma Dame sen va,

Vn tel meschef de temps ne sy trouua.

Arbres fruictiers, & vignes y sont telles

Quau parauant, bien fleuries, & belles.

Mais (ie te pry) quand tout seroit gelé

(Que Dieu ne uueille) & de long, & de lé

Au iugement de lhomme, & à la veuë,

Dieu peult il pas ne laisser despourueuë

Sa creature en son affliction ?

Puis nay ie pas bonne prouision ?

Voyla comment lors que me complaigny,

Me remonstra le lieu de Glatigny.

I[’]ay tresbien pris sa remonstrance faicte.

Or il est temps de sonner la retraicte :

Car (Monseigneur) maint affaire autre part,

Ia me semond. Le Seigneur Dieu vous gard.

EScrire veulx (encore que nay mye

Sçauoir pour toy) ma bonne, & sage amye,

Comment mon corps, & mon Esprit se sent,

Toutes les fois que de toy suis absent.

Comment escrire ? Ha par trop ie presume :

Car il ny ha au monde langue ou plume,

Qui plainement le peust dire, ou escrire :

Mais en diray ce que ie pourray dire.

Iescriray donc, mais non pas la moytié :

Car qui pourroit bien dire l’amytié

D’entre nous deux, telle que ie la sens ?

Certes Amour passe tout humain sens.

En tescriuant bien te vouldroye induyre,

De supporter ce quen amour peult nuyre,

Comme ie fay. Car la raison veult bien,

Que quelque mal accompaigne vn grand bien.

Premierement quand de toy suis arriere,

Me sens muer en toute autre manière :

Et mest aduis qu’euidemment ie voy,

Que suis vn autre, & que ce nest plus moy.

Là ou iestois monstrant toute lyesse,

Ie suis mué comme en vne vieillesse.

Là ou iauois cueur ioyeux, & riant,

Ie suis pensif, & tout propos hayant.

O quel ennuy, ô quelle dure chose,

Quand fault souffrir telle Metamorphose,

En cueur, & corps telle mutation !

Mais quelle ioye, & delectation,

Quand ie te voy, & contemple à mon aise ?

Amour ne peult rien faire qui ne plaise.

Là ou ie suis, là certes ne suis pas :

Car ou tu es ie quiers faire mes pas.

Ce que ie oy dire, ou que ie voy, se passe :

Tout ne mest rien, tout se perd, & sefface

Fors que de toy vn tresgrand souuenir,

Qu’incessamment sens aller, & venir

Par tous les lieux de mon pesant creueau,

En luy donnant tousiours trauail nouueau,

Qui est meslé dune ioye nouuelle,

Qui dans mon cueur sengendre, & renouuelle.

Serois ie ainsi si beaucoup ne taymois ?

Le iour mest an, les heures me sont moys,

Pareillement les minutes tousiours,

Quand ne te voy, me semblent bien longs iours.

Ie tais le reste : außi trop long seroye,

Si ce propos plus loing ie poursuiuoye.

Puis quainsi est doncques que ie supporte

Ces maulx pour toy, il fault que ie tenhorte,

Que de ta part supportes les assaultz,

Que bonne amour donne à tous ses vassaulx.

Et sil y ha quelque propos d’enuie

(Qui regnera tant quamour soit en vie)

Nen prens soulcy, laissons les enuieux,

Nous maintenans tant que nous soyons vieulx

En forte amour, & dautant plus constante,

Comme y sera enuie resistante.

Lors prouueray ta bonne affection :

Lors congnoistray ta grand perfection.

Car toute chose excellente, & bien bonne,

Son contraire ha, qui à faire luy donne.

Iamais doulceur ne va sans quelque fiel.

Ne vois tu pas, si veulx tirer le miel

Dauec la cire, il fault que tu te iettes

Entre aguillons des petites auetes ?

Qui veult cueillir vne Rose bien souefue,

Quelque poincture il fault quil en reçoyue.

Ainsi qui veult damours cueillir le fruict,

Craindre ne doibt trouuer chose qui nuyt.

Cerainement cest tousiours la coustume,

Quauec doulceur y ait quelque amertume :

Auev bien, mal : auec amours, soulcy :

Peine, trauail, ennuy, & dueil außi :

Car de Venus le brandon, & flambeau

Qui est tant chault, tant luysant, & tant beau,

Sestaindroit tost sil nesoit par le vent

Meu, excité, & agité souuent.

Mais dautant plus lamour luyt, & est claire,

Comme assaillie elle est par son contraire.

Pour estre brief, toute chose en effect,

Par son contraire est en estat parfaict.

PVis que pour moy Cupido ha tant faict,

Quil me presente vn present si parfaict,

Quand vous mauez souuent (ma Damoyselle)

Monstré bon œil, bonne faueur, bon zele,

Pourrois ie bien (dictes) estre repris

Daymer vn bien de tel valeur, & pris ?

Et doy ie faire à lamour resistance,

Tant que de vous ie quicte laccointance ?

Lon dict souuent, celuy ne faict pas bien,

Lequel en temps ne poursuit pas son bien.

Pareillement on dit que tel refuse

Vn bien present, qui long temps apres muse :

Et sans lequel pourra long temps souffrir.

Parquoy ce bien qui tant me vient se offrir,

De bien grand cueur sans cesse vueil poursuyure,

Lapprehender, & sans quelque peur suyure.

Craindre ne doy, puis quil me vient si pres.

Mais sil sesloigne, & bien ie iray apres.

Sil perseuere, encor tousiours iray ie,

Par pluye & vent, & par glace, & par neige :

Car cest vn bien qui vault bien le pourchas.

O mon seul bien, pourquoy tant m’aprochas,

Et me rauis, tant criray ie apres elle,

Que de pitié aura quelque estincelle.

En fin aura quelque bon souuenir,

De me veoir tant apres aller, venir.

Ce bien nest point tenant de lauarice,

Ce bien nest point pierrerie, or, argent :

Mais cest vn bien precieux, beau, & gent,

Qui nest subiect à dressoir, ny à coffre,

Ny aux larrons. ô quel bien, ô quel offre !

Fy de tous biens, fy dargent, & fy d’or,

Si vne fois puis gaigner ce tresor.

Des à present toute ma part ien quicte,

Si puis auoir ce bien de haulte eslite.

Mais quel doubte ay ie ? est il pas desia mien ?

Ne lay ie pas, le tien ie pas ce bien ?

Certes ouy, mon œil, ma main, ma bouche

Quatre ou cinq fois le voit, le tient, le touche.

Que reste il plus ? fors sans fin lestimer,

Lentretenir, le cherir, & aymer ?

Qui se fera, ien ay bien bonne enuie,

Tant que ce corps demourera en vie.

Car cest vn bien si parfaict, & si hault,

Quvn million dautres biens il en vault.

Cest le seul bien lequel en ce bas monde

Mect en vn cueur lyesse si parfonde,

Que tant sen fault quil sen puisse assouuir,

Qu’incessamment vers luy se sent rauir.

Voila comment (Damoyselle cherie)

Ie vous prefere à or, & pierrerie :

Car ce grand bien que i[’]ay tant exalté

Se trouue en vous, cest vous en verité.

Ce nest point or que la rouille consomme :

Ne perle außi, mais cest vous mesme en somme.

Iespere donc bien heureux deuenir,

Quand vn tel bien ie puis veoir, & tenir.

Veoir, & tenir, ô que cest belle chose !

Mais le mal est que la bague est enclose :

Ainsi la veoir, cest veoir aucunement,

Mais ce nest veoir, ne tenir proprement.

Cest seulement en veoir la couuerture,

Et la tenir, ô chose griefue, & dure !

Ma Damoyselle, ostez doncques, ostez

Ceste closture, & la bague apportez

Deuant mes yeulx sans couuerture, & nuë,

Pour esprouuer sa tant riche valuë.

NY ha il point quelque pitié en femme,

A tout le moins en celle qui enflamme

Si fort mon cueur, que la grande chaleur

Redondera à son tresgrand maleur ?

Maleur tresgrand, si la pluye de grace

Dedans brief temps ne lestainct, & efface,

Car si tousiours il se veult alumer,

Auant huict iours me pourroit consumer.

Puis en la fin par cruelle vengeance

Tourner sur elle, & sans quelque alegeance

Luy consume cueur, corps, mammelle, & tainct.

Ainsi soit il, si elle ne lestainct,

Quand elle peult, à fin que me resemble,

Et que soyons tous deux bruslez ensemble,

Dun mesme feu plus grand que cil d’Ethna.

Si enuers moy bon vouloir elle na,

Nest elle pas bien faulse, & peu fidele

De me tenter à querir plaisir d’elle ?

Ha ce nest pas petit cas, par faulx tour,

Et faulx semblant, de se mocquer damour :

Et irriter Venus la grand Deesse,

Troublant sa grace, & beaulté, & liesse.

Aux dieux puissans ne faict bon se iouer :

Ains il conuient les aymer, & louer,

Suyure, seruir dun vray cueur sans faintise.

Quand à l[’]amour, le cueur qui se desguise,

I[’]ay veu souffrir, ardant, impatient :

Et en la fin faire à bon escient.

I [’]Ay bien souuent est émeu vous escrire,

Quelque mißiue, à fin que peußiez lire,

Et en lisant sentir ce qui me poinct :

Mais tout soubdain ie disois, nescry point.

En vn instant ie pense, & contrepense.

Ie me permectz, puis ie me fay deffense,

Tost escriuant, außi tost le deßire :

Mais desirant sans cesse ie desire.

Brief en la fin ayant par maintes nuictz

Songé, resué, non sans fascheux ennuitz,

Dame, à ce poinct me suis voulu resouldre

De vous escrire : Or m[’]en vueillez absouldre.

Il m[’]est aduis si i[’]ay bon iugement,

Que l[’]escriture est vn allegement

Aux cueurs pressez, & que ce que la bouche

N[’]ose pas dire, en escrit on le couche.

L’escrire donc me peult bien soulager,

Et ne vous peult (ma Dame) dommager.

On escrit bien aux plus grands ennemis :

Combien plus tost à ses plus grands amys ?

De vostre part si sentez l[’]amytié,

Que ie vous porte, à peine est ce à moytié.

Mais ie ne sçay si ie doy desirer,

Ce que desire, & y perseuerer :

C[’]est que soyez (ô ma Dame honoree)

Ou plus que moy, ou moins que moy nauree.

Ou plus à fin que vous m[’]en departiez :

Ou moins, à fin que moindre mal sentiez.

Au monde ay veu Dames, & Damoyselles,

I[’]ay veu plusieurs filles, & femmes belles,

I[’]en ay veu mainte, & en mainte contree,

De bonne grace, autant bien accoustree :

I[’]ay deuisé, i[’]ay beu, mangé, hanté :

Mais onc ne fus tant surpris, n[’]arresté.

Ha ie sens bien qu[’]amour, pour toute reste,

Tant plus tard vient, tant plus fort nous moleste.

Mais il fault dire, & la chose est bien vraye,

Que voz vertus m[’]ont faict ceste grand playe.

Le coup est grand, & plus grand qu[’]il ne semble,

Car il me naure Esprit & corps ensemble.

Si me puis bien d[’]une chose vanter,

Qu[’]amour me vient heureusement tenter.

Außi pouuez bien vous vanter adoncques,

Qu[’]auez sur moy ce que femme n[’]eut oncques.

Vostre Esprit bon, vostre ferme mémoire,

Vostre constance, & grand vertu notoire,

Vostre doulceur, & humble priuauté,

Vostre cueur plain de grande loyaulté,

Vostre sagesse, & bonne contenance,

Me font de vous l[’]amour, & souuenance.

L[’]amour qui mord, & de si pres me picque,

Que ne s[’]en va pour aucune replique :

Ains que tousiours, plus luy viens repliquer,

Plus aigrement le sens mon cueur picquer.

Ha, dit mon cueur, fault il que sa vertu

Me rende ainsi confus, & abbatu ?

O Dieu ! fault il (voicy vne grand-chose)

Que son grand bien soit de mon grand mal cause ?

Soit qu[’]a l[’]eguille on vous voit besoigner,

Soit que veniez vostre fille peigner,

Tout vous siet bien : soit debout, ou à table,

En vous reluit vne façon traictable.

N[’]ay ie senty des traictz d[’]œil gracieux,

Tirez du cueur que sur tous i[’]ayme mieulx ?

O quel grand bien qu[’]il fault dißimuler !

Mais quel grand mal, puis qu[’]il le fault celer,

Et par souspir tirer de loing l[’]alaine.

Iadis pour veoir, & pour auoir Heleine,

S[’]en vint de Troye en la Grece Paris :

Ie vien pour vous d’Italie à Paris.

Ie croyrois bien que ne le pensez pas :

Mais la grand cause estes de ce grand pas.

Soit à Thurin, à Versel, ou Milan,

Ie vous ay eu en cueur le long de L[’]an.

Soit à Venise, à Mantouë, ou Cremone,

Tousiours pensois à vostre humble personne.

Si lisez bien mon escrit de Lyon,

Le sentirez non sans affection.

Amour me feit au retour tant oser,

Que vous allay la premiere baiser :

Sans prendre esgard d[’]embrasser vostre Père

Premierement, ou baiser vostre Mere.

Amour me faict ietter l[’]œil tendrement :

Amour me faict menger petitement.

Et puis ie dy que païs estranger

M[’]aprent ainsi petitement menger.

Amour me faict escrire la presente.

Qui vous descrit mon mal, & represente :

Cause d[’]escrire ay autant que i’euz onc :

Mais toutesfois ne veulx estre tant long.

Quand aurez leu L[’]epistre (ô fleur des Dames)

Ie vous supply iettez au feu ces flammes,

Et vous gardez que n[’]en soyez attainte,

Car vous aymant i[’]ay de vostre mal crainte,

Et de ma part bien vous veulx faire entendre,

Que me pouuez commander, & deffendre.

Ce qui vous plaist hardiment commandez.

Ce qui ne plaist, si me le deffendez

Ie m[’]en tiendray, Dame, ie vous l[’]ottroye,

Fors vous aymer : car cela ne pourroye.

Q  Vand en tes mains ce liure frequẽtoit,

  Et que releu comme le liure estoit

  De bout en bout, ma bõne damoyselle,

  Tu m[’]en croyras, ie fus esmeu d[’]un zele

De grand remors, & encor ie le sens,

Pour d[’]aucuns motz, & außi pour le sens.

Supporte doncpar ta grande sagesse,

Les passetemps, & abus de ieunesse.

Bon faict sçauoir le mal, pour l’euiter :

Non pour mouuoir, & pour se y esciter.

Des choses ha que si ieune i[’]ay faictes,

Qu[’]impoßible est que n[’]en soient moins parfaictes :

Car en l[’]esprit bien difficilement

On trouuera ieunesse, & iugement.

Plaisir me fut veoir la copie entiere :

Mais dueil me feit l[’]escriture premiere.

Par poinctz mal faictz, & imperfections,

Faulse orthographe, & incorrections.

Le tout n[’]aduint sinon par mon absence,

Quand l[’]escriuain desiroit ma presence.

Ainsi mes vers, que bien que mal, rimez,

Ne furent pas par ma plume limez :

Car l[’]escriuain n[’]en auoit que le double,

Qu’vn ignorant rendit confus, & trouble.

Dont tu ne dois m[’]en mettre rien à sus.

Or i[’]ay paßé ma plume par-dessus.

Mais si i[’]en ay bien trenché, & osté,

I[’]en ay außi non pas moins adiousté.

Brief l[’]ay reueu, recorrigé, refaict.

Reçoy le donc comme tout nouueau faict.

I’y ay pris peine, & ay l’œuure refaicte,

Que ie vouldrois veoir encor plus parfaicte.

Mais i[’]en voy peu, à mon affection,

D[’]autre, ou de moy ayant perfection.

Voyla que c[’]est, apres peine bien grande,

Rien n[’]est parfaict ainsi qu[’]on le demande.

Et puis souuent entre les conferens,

Les iugemens sont si tresdifferens,

Que là, ou l[’]un du bien en vouldra dire,

L[’]autre dira qu[’]il y trouue à redire.

L[’]un le dit cler, l[’]autre le dit obscur :

L[’]un veult du mol, & l[’]autre veult du dur.

Parquoy en tout y ha besoing d’excuse :

Et en premier moymesme ie m[’]accuse.

ET iours, & nuictz, pensant à ta beaulté,

Dame de cueur tant plain de loyaulté,

Rauy me sens en vn tel pensement,

Que suis content penser incessamment.

Car ta beaulté, honneur, sçauoir, & grace,

Et tout en toy toutes autres surpasse.

Beaulté, sçauoir, & grace sont vertuz,

Plaines d[’]honneur. Ceulx qui en sont vestuz,

Meritent bien d[’]entrer en renommee,

Et en memoire. Ainsi, Dame estimee,

Ne t[’]esbahy si ta grace immortelle

Se represente en moy tant haulte, & belle :

Et si i[’]en ay souuenance souuent :

Car de vertu ie veulx estre seruant.

Et la vertu ie ne veulx iamais taire.

Tu es le chef, & le vray exemplaire

De tout honneur, beaulté, grace, sçauoir.

O grand miroer, ou tout bien se peult veoir !

Ou recongnoist tout le femenin sexe,

Toute vertu qui en toy n[’]a point cesse.

Plus ioyeux suis regardant ton maintien,

Que qui diroit en ouurant ma main, tien

Voyla deux cens escuz d[’]or au soleil.

Mais que pourroit se trouuer dessoubz l[’]œil,

Que i[’]ay en teste, à moy plus agreable,

Que contempler ta grace tant traictable ?

Vn doulx parler de ta bouche prent cours,

Tes motz dorez ne sont trop longs ne courts :

Ce beau don là t[’]a eslargy Mercure.

Par grand beaulté tu luys oultre mesure :

Dame Venus ce grand don t[’]a donné.

Par sagesse est tout ton faict ordonné :

Pallas te faict de ce beau don iouyr.

Doy ie pas donc grandement m[’]esiouyr,

Quand ie te voy si amplement parfaicte,

Que pour exemple aux autres tu es faicte ?

Bien heureux donc qui par bonne accointance

De tant de biens aura la congnoissance :

Et plus heureux, cent fois plus, sur mon ame,

Qui congnoistra de tant de biens la Dame.

C  ATIN, ton chãt, & doulce voix,

  Mon cueur, & sens ha resjouy.

  Et en tescoutant tant de fois,

  De grande liesse ay iouy,

Quand si doulx chant de toy i’ouy.

Or ton chant auec toy mourra,

Et apres toy ne demourra :

Mais ce petit chant de ma Muse,

Long temps apres moy durera :

Oy le donc, & ne le refuse.

Vostre boucquet est plus riche que moy,

Car il est tout de fin or, & de soye.

Et dessus moy, or, ne soye ne voy.

Mais nonobstant que rien moins ie ne soye

Que son pareil, & que ie ne me voye

Si richement vestu, paré, orné

Certes iamais ne le refuseroye,

Venant du lieu dont il me fut donné.

La bourse que donné m’auez

D[’]une affection tant heureuse,

Est belle, grande, & plantureuse,

Et vault plus que ne me debuez.

Mais (madame) vous ne sçauez,

Ce que m[’]en ont dict en maintz lieux,

Plusieurs amys qui ont bons yeulx,

Et en telz cas tresbien expertz :

Vn mal y ha (dont beaucoup perds)

Que ne fut pleine d[’]escuz vieux.

Quand me ioue à Anne, elle dit,

Or deportez vostre ieunesse :

Mais si par ieu ie n[’]ay credit,

Ne le puis ie auoir par largesse ?

Largesse en est la grand prouesse :

Largesse y vaut plus que sagesse.

Quand donc la vainqs par fonsement.

D[’]vn ieune homme rien que ieu n’est ce,

(Ce dit Anne) & par mon serment

Il fault supporter sa ieunesse.

Quand souuent je pry mon Mary,

Il me respond, ie suis marri

Qu[’]il faut que ie vous le refuse :

Nest ce pas vne belle excuse ?

Quant à beaulté, l[’]experience

De regard, & de viue voix

Vault dauantage, & mieulx cent fois

Que la lecture, & la science.

I[’]ay veu que desprisoye amours :

Mais maintenant tout au rebours,

Depuis qu’ay gousté sa doulceur,

Il n[’]y ha ne frere ne sœur,

Il n[’]y ha ne Grac, ne Latin,

Qui me gardast d[’]aymer Catin.

Ma bonne amye, i[’]ay songé

Que prenois les Grues volantes.

Que dit cela ? est ce congé

Et refus des choses plaisantes,

Que soubz paroles trop cuisantes

Me donras, me baillant la grue ?

Garde t[’]en bien. car tost ie rue

Fort & ferme sur deux, ou trois :

Et ay songé que je les tue.

Cela dit que m[’]en vengerois.

Ne t[’]esbahy de ce grand froid,

Comme il gele à pierres fendantes :

Car toutes chaleurs sont tout droit

Deuers mon foible cueur tendantes.

Toutes les grans chaleurs branslantes

Au monde (Amye) ont dit adieu,

Et se logent au beau milieu

De mon cueur : forte amour l[’]ordonne.

Approche donc de ce chault lieu,

A celle fin que je t[’]en donne.

Madame Ieanne mon hostesse,

Autant belle qu[’]il en peult estre,

Me demandoit si querois maistre :

Non (dy ie) mais vne maistresse.

Madamoyselle tant benigne,

Il fault appliquer la lancette,

Non sur l’antrac de ton eschigne,

Mais sur ta playe vermeillette.

Ainsi comme Catin se mire,

En peignant son beau chef doré,

Le Soleil vient droit dessus luyre :

Et ha si beau chef adoré.

Par vn matin Catin se mire,

Et peignant son beau chef doré :

Mais le Soleil ses rays retire,

De dueil qu[’]il ha & de grand ire,

De veoir vn chef si bien paré.

Pour tes estreines ie te donne

Ce que ie ne me puis donner.

C[’]est une amye belle, & bonne :

Riche, sage, telle personne

Que tu sçaurois bien blasonner.

Pour vn Amant resusciter

Transi d[’]amours tant que c[’]est rage,

On luy vient dire, & rapporter

Qu[’]il prenne vn petit de courage,

Et qu[’]il l[’]aura en mariage.

Il se guerit : on la marie

A vn autre. saincte Marie

N[’]en perd il point l[’]entendement

Pour telle proye ainsi perie ?

Non : mais deux fois meurt seulement.

Anne est si sage, bonne, & belle,

Que bien me veuil mirer sur elle.

Martin playdoit vne monture :

Son proces gaigna d[’]aventure.

Dessus monta, vers la minuict,

Car c[’]estoit monture de nuict.

Si vraye amour merite recompense,

Et si pitié n[’]a perdu son pouuoir,

Chef de beauté il fauldra bien qu[’]on pense

De quelque octroy gracieux me pouruoir.

Car si pitié n’ouure tes yeux pour veoir

L[’]estat auquel ie suis pour t[’]aymer seule,

T’amour en fin me sera vne meule

Pendue au col, me plongeant en la Mer

De desespoir, ou sans fin je me deule

De tel aymer, trop plus que fiel amer.

Prié t[’]auoye (amye) en amytié,

Que souppißions hier ton Oye grasse :

Mais tu n[’]en mis au feu que la moytié :

Ne suis ie donc qu’ademy en ta grace ?

Tu t[’]esbahis qu[’]en champs & villes

Je me ry tant auec les Filles :

Plus m[’]esbahis de tes façons,

Qui tant ris avec les Garsons.

Ce iourdhuy, veille de dimenche,

I[’]ay plus de cent fois souhaitté

Que ce Mouschart dedans ma manche,

Comme mon mouschoir eust esté.

Bien durement l[’]eusse traicté.

Tu es asseuree de faict,

Que je l[’]eusse bien molesté

Autant ou plus qu[’]il nous ha faict.

Ie t[’]ayme d[’]amour si extreme,

Que ie me donne à toy moymesme :

Si tu ne veulx iouyr de moy,

Au moins que iouysse de toy.

Fy de long temps faire aux Dames la court :

I[’]ayme qu[’]on m[’]ayme, & qu[’]on le face court.

Ce iourdhuy pour l[’]amour du temps

Tu ne veulx coucher auec moy :

Mais (amye) si tu l[’]entends

Te garderay de tout esmoy.

Car si la fouldre en grand effroy

Descend auec vn gros tonnerre

Fauldra que pres de toy me serre :

Pour t[’]asseurer t[’]embrasseray :

Puis te liureray autre guerre

Si tost qu[’]entre tes bras seray.

Ie l[’]ay perdu bien meschamment

L[’]anneau que n[’]ay porté qu[’]vn iour :

Mais si i[’]en eusse gentiment

Faict quelque Dame par amour !

Madamoyselle, si la fieure

Qui de soupper vous ha gardee,

Couroit außi viste qu[’]vn Lieure

Quand les Chiens l[’]auroient regardee :

Tost eust esté contregardee

Vostre beaulté de sa malice.

Car pour chasser la faulse lice,

I[’]eusse hallé grans chiens expres,

A fin de vous faire service,

Qu[’]eussiez recongneu puis apres.

Souuent je veulx baiser Catin,

Laquelle n[’]ose pour sa mere

Me baiser ne soir, ne matin :

Qui est dure chose, & amere.

Vn jour la mere par mystere

Fut deceue sans y viser,

Catin vient l[’]enfant appaiser,

Mais elle entend bien son latin.

Lors ie fay semblant de baiser

L[’]enfant, & je baise Catin.

Entre vne Femme, & vn Nauire,

Il n[’]y ha pas beaucoup à dire :

Car tous deux (qui veult monter)

Ne sont faictes que pour porter.

I[’]ay congneu deux belles fillettes,

L[’]une à Angers, & l[’]autre à Tours :

Toutes deux ieunes, gentes, nettes,

Et bien propres en leurs atours :

Dignes de Royalles amours.

Toutes deux portans le nom d’ Anne :

Toutes deux blanches comme mannes :

De cueurs gays, & de corps legers :

En ce different (dame Ieanne)

L[’]une est de Tours, l[’]autre est d’Angers.

Catin ma gentille brunette,

Tu t[’]es faicte saigner du bras :

Pour estre plus saine & plus nette,

Il te falloit saigner du bas.

Ton grief depart m’a departi :

Et ton depart te laisse entiere,

Car mon cueur s[’]est de moy parti

Pour te suyure à coste, ou arriere :

Le seul corps demeure derriere.

Mais tu as ton cueur à toute heure,

Car auec moy point ne demeure.

O auare qui as deux cueurs,

Rens m[’]en l[’]un, ou bien ie t[’]asseure

Sans plus attendre ie me meurs.

Amour fuy t[’]en au loing de moy,

Avec tous tes bancquetz, & pompes

Tu n[’]es que dueil, peine, & esmoy,

Et le meilleur en fin tu trompes.

Fuy t[’]en de moy, fuy t[’]en arriere:

Car ta beaulté tant singuliere

Trop dangereux mal me pourchasse,

Si tu ne me fais quelque grace.

Ie m[’]esbahy qu[’]en eau je suis fondu,

Qui n[’]ay iamais les poures ioues seiches :

Plus m[’]esbahy qu’Amour ne m[’]a rendu

Tout conuerti en cendres, & flammesches,

Ausßi aisé comme petites mesches.

Ie suis le Nil, & suis le mont Etna :

Etna, pourtant qu[’]au monde tel feu n[’]a :

Le Nil, pourtant que ie fondz tout en pleurs.

Feu, boy ces pleurs qu’Amour me resigna :

Pleurs restraignez ce feu, & ces chaleurs.

A vne dame de Bretaigne,

Doubtant pourquoy ne conceuoit,

Luy respondy qu[’]elle resuoit

En presence de sa compaigne :

Et que ne m[’]en esbahy point.

Lors elle en veult sçavoir le poinct,

Que tost declairer ie ne daigne.

Mais quand en train ie fus entré,

Ie luy dis quelle estoit brehaigne,

Et son mary estoit chastré.

Ie te renvoye ton liuret,

Tout sain & sauf dame Michelle,

Preste m[’]en vn autre secret

De ta librairie plus belle :

Ou de cueur, de corps, & grand zele ;

Par maintes nuictz i[’]estudiray,

Et les fueilletz retourneray.

O le trebeau, & plaisant liure !

Auquel s[’]il te plaist i[’]escriray.

Dy donc le mot, & me le liure.

Estre ne veulx en mesme livre

Spirituel et terrien :

Puis l[’]amour, puis la vertu suyure,

Brouillant le mal auec le bien.

Mais les Anciens le font bien,

Qui ont vescu tant bien prosperes.

Tout cela ie ne ignore rien :

Mais ie ne veulx suyure mes Peres.

Ie fuis trop plus viste qu’vn Lieure,

Deuant la face de Catin :

Car ny mon Grec, ny mon Latin

Me garderoient de chaulde fieure.

Si tu es constante à m[’]aymer,

En mes œuures te feray viure :

Viure sans fin, sans consumer,

Telle recompense te liure.

Ton nom sera de mort deliure,

Soit par mes vers, soit par ma prose.

O que plusieurs (si leur bouche ose)

Diroient (amy) i[’]en suis d[’]accord !

Car qui vouldroit plus belle chose,

Que viure encor apres la mort ?

Vous estes donc deux (ce me semble)

Damoiselles bonnes ensemble :

Car ce que l[’]une va laissant,

L[’]autre le va tost embrassant.

Mais ie pren vn cas qui se face

C[’]est que l[’]une & l[’]autre embrasse.

Pour guerir damoiselle Bieure,

Droict en sa chambre me rendray :

Et seule seul la surprendray.

Je luy feray perdre la fieure.

Vn vieillard maintenir vouloit

Que son engin estoit plus fort

Que de tout temps il ne souloit :

Et je n[’]en estois pas d[’]accord.

Mais de son dire il n[’]eut pas tort,

La raison qui vouldra, l[’]entende.

I[’]ay veu que tout seul il se bende

(Dit il) mais ores sur ma foy,

Si nous ny sommes (qu[’]on me pende)

Bien empeschez ma femme, & moy.

Vn baiser tu m[’]as refusé,

Comme rusee, & non pas fine.

Mais ie m[’]estois bien abusé,

Baiser te fault (belle Robine)

D[’]un Maure la grosse babine

Sentant son Bouc. ou bien Pernet

Qui faict cent fois plus laide mine,

Que maistre Pierre du coignet.

Va mon bouquet puis q̃ tant es heureux

D[’]estre logé sans soupson, & sans crainte

Avecques celle, ou moy trop malheureux

Ne puis donner sinon de l[’]œil attainte.

Au moins bouquet pour faire ton deuoir,

Si tant de bien te pouuoit aduenir,

Que dans un lict nue la peusse veoir,

Souhaitte moy vif en ton lieu venir.

S[’]il ne tenoit sinon à mon souhait,

Ne la verrois en un lict toute nue,

Ainsi que moy, qui ioyeux & dehait,

Mais sans nulz yeux l[’]y ay veue, & reueue :

Sans main touchee, & sans bouche baisee,

N[’]estant esmeu : mais toy tout au contraire

(La chose en est à croire bien aisee)

Tu luy ferois ce que ie n[’]ay peu faire.

Tu te deuois de grand matin leuer,

Pour me venir en ma chambre trouuer :

Mais le dormir, ou autre amy t[’]amuse.

Bren donc pour toy, & bren pour ton excuse.

Vne Dame (en amours grand proye)

Vn iour me dit, & me propose

Que le bout du nez rouge auoye :

Mais ie n[’]eu pas la bouche close,

Ains luy respondy promptement :

Aussi ay ie bien autre chose

Dame à vostre commandement.

Dame, & bonne amye Thomasse,

On dit que tu es toute hommasse :

Et que je suis tout femenin.

Je te pry donc de cueur benin

Trouue toy quelque part seulette,

Tu scauras si ie suis fillette :

Lors par mesme moyen en somme

Ie scauray bien si tu es homme.

Quelcun disoit à dame Claire,

N[’]espargnez si auez affaire

De quelque chose que ie pisse

(En cuydant dire que ie puisse)

Elle respond, s[’]il vient à poinct

Ie ne vous l[’]espargneray point.

Le genoil qui sert à Venus,

Ha eu des maulx à ce matin,

Si ces maulx luy sont aduenus

Par bien cheuaucher en Latin,

Je m[’]en rapporte à ma Catin.

Mais vn bon gentil Robinet

Qu[’]ay rencontré au matinet,

A mon secours est accouru.

Je pry Dieu de cueur franc, & nect,

Qu[’]onc ne coure comme ay couru.

La Dame qui tant te farfouille,

(Si de ses ieux entends la source)

Cherche si tu as bonne bourse :

Non pas si tu as bonne couille.

Les Epigrammes ont licence,

Et de poindre, & de chatouiller :

Et pourtant l[’]ignorant ne pense

De me venir cy barbouiller,

Que trop mes vers je vien souiller,

Et que i[’]offense les oreilles.

L[’]epigramme est mal accoustré,

S[’]il ne point. Mais voicy merueilles,

Qui vit onc Priapus chastré ?

Tu me fais bien mourir en languissant,

Dame pour qui je souffre tant de peine :

Car faulx rapport qui va affoiblissant

Mon poure cueur, m[’]a trop mis en ta hayne.

Mais s[’]il te plaist ces iours en bonne estreine,

Donner congé de parler à ma bouche,

Et n[’]estre plus si estrange, & farouche,

Tu congnoistras qu[’]envers toy n[’]ay mespris :

Et que t[’]amour si viuement me touche,

Que suis tousiours ton prisonnier bien pris.

Chef de beaulté que Dieu feit estre né

Pour recreer mes sens, & mes Espritz,

Si n[’]as esté de par moy estrené

Jusque à ce iour, ne me metz à despris,

Ny mon present qui est de petit pris,

Vers la splendeur de la fleur de ton aage.

Mais toutesfois il vient de bon courage,

Et le bon cueur faict le present valoir.

Avec lequel me donne pour hostage

A ta puissance, & à ton hault vouloir.

Je m[’]esbahy Madamoiselle,

Que tu te souffres tant garder,

Que ny au jour, n[’]a la chandelle

L[’]on ne te ose pas regarder.

Or si diray ie, sans bourder,

Que tu n[’]es point Yo, qu[’]il faille

Que Iuno à garder te baille

A Argus garny de cent yeulx.

Mais ton Argus est de sa taille:

Car il est assez glorieux.

Pour ma petite Tourengelle,

Tant gracieuse honneste, & belle,

Souuent i[’]endure froid, & chault.

Ie voys, ie viens, & ne me chault

Que ie despende par la voye,

Tant seulement mais que la voye.

Puis qu[’]avez mengé le boudin

Pour l[’]amour de moy : ie feray

Qu’vn plus beau vous presenteray

Quand viendrez en nostre Iardin.

Catin se plainct, Catin se deult,

Quelle ne voit tous mes escriptz :

Et dit, ie veulx que me les liures.

Puis quand i[’]entends ses plaintz & criz,

Ie suis content s’elle me veult

Donner ses lebures pour mes liures.

Vn Mercerot troussant ses hardes,

Se fiche au doigt quelques eschardes :

Et dit, lors qu[’]il s[’]en trouuoit mal,

Petite chose faict grand mal :

Sa femme respond, außi bien

Petite chose faict grand bien.

Ie sens en moy regner dame Discorde,

Et c[’]est par toy, & si tu n[’]en peulx mais :

Amour qui art, contre Crainte Discorde :

Crainte me serre, Amour vainc desormais,

Et ha iure qu[’]il vaincra à iamais.

Puis que de toy ce different procede,

Donne conseil, faueur, ayde, & remede,

Iugeant ainsi que le requiert le droict.

Ne te mesprens, car seule es qui possede

Tout le moyen de la cause orendroit.

L[’]œil navré, l[’]œil ne me peult guerir :

Malade suis, l[’]œil n[’]est pas ma santé :

Œil si tu veulx me rendre contenté,

Soubdain te fault le vray content querir.

Nauré m[’]auez, vous me pouuez guerir :

Malade suis, & ma sante vous estes.

Excusez moy, car voz maintiens honnestes

M[’]ont enhardy le remede querir.

Oeil responds moy, pourquoy m[’]as tu nauré ?

Langue, pourquoy as tu mon cueur rauy ?

O mon las cueur si tu n[’]es assouuy,

Iamais pour vray ma liberté n[’]auray.

Amour gouuerne la personne :

Amour au cueur la ioye donne :

Amour presente tout seruice :

Et n[’]y ha rien qu[’]amour ne puisse.

Amour bien hault entreprendra :

Amour à son honneur viendra.

Amour nous dompte, Amour nous change.

Mais n[’]est ce point vn cas estrange ?

On dit qu[’] amour n[’]est qu[’]vn enfant :

Je le trouue un Dieu triumphant.

Amour, ie ne sçay comment c[’]est,

Mais sans cesse, ne sans arrest,

Dedans le ventre me fretille :

Il me debat, il me petille.

Comme les femmes à mon tour

Ne serois ie point gros d’amour ?

Or ie pry doncques saincte Auoye,

Que descharger tost, & à ioye.

Saincte pres, & saincte concorde,

Saincte grace, & misericorde,

Saincte gente, & saincte menue,

Saincte abas, & saincte corps nue,

Saincte blonde, & saincte ragonde,

Et sainste [sic pour saincte] premiere, ou seconde,

Saincte toute, & saincte chascune,

Saincte clere, & saincte opportune,

Saincte adresse, & saincte rencontre,

Qu[’]ilz m[’]en enuoyent bonne encontre.

Aux Innocens quand vous me dictes,

Que priasse bien Dieu pour vous,

Ie le fey : donc par mes merites

Ie veulx gaigner vostre cueur doulx.

Plus de cent fois, mais à tous coups

Disois ainsi ma patenostre :

Le Dieu d[’]amours la face nostre.

Mon cueur deuot, à vostre aduis,

Priant si fort l[’]amour du vostre,

Prioit il pour les mors, ou vifz ?

Ta beaulté me donne esperance :

Ta cruaulté desesperance :

Espoir me paist, & vient nourrir :

Mais desespoir me faict mourir.

Par toy ie vis, par toy ie mœurs :

Ie vis en te voyant si belle :

Mais ie mœurs par tes dures mœurs,

Quand ie te sens si fort cruelle.

Ie t[’]ayme plus que mes deux yeulx,

Car tu sçais bien parler, & taire,

Et par grand artifice faire

La chose que i[’]ayme le mieulx.

Bon Amy, d[’]une bonne amye,

Ce iourdhuy te veulx estrener :

Car tu dis que tu n[’]en as mye,

Qui est assez pour m[’]estonner.

Une Nymphe te veulx donner,

Que soubz maint arbre, & mainte branche

Iras cherchant, soit brune, ou blanche.

Ce present ie t[’]ay voulu faire,

D[’]une bonne volunté franche :

Car on en ha souuent affaire.

Tu sçais tresmal temporiser,

Ma gente Damoiselle Blaise :

Mais si tu ne me veulx baiser,

A tout le moins que ie te baise.

Si humble & doulx me trouueras,

Que tout seruice te feray :

Mesme quand crotee seras,

De bon cueur te descroteray.

Ie suis ioyeux pensant estre en ta grace,

Que s[’]il est faulx le mien tel pensement,

Confesser doy que ne congnoy la trace

Du Dieu d[’]amours, ne son auansement,

Et que mon œil y voyoit troublement.

Mais s[’]il y voit assez cler, sans doubtance,

Son iugement doit auoir importance.

Confesse donc, autrement ton soubz ris,

Maintien, regard, feront signifiance,

Que amour secret est declaré soubz ris.

Si femme y ha de bonne grace,

Gente de corps, belle de face,

Et à toutes vertus encline,

Ie dy que c[’]est Dame Rolline.

Dame Rolline se comporte,

Et parle de tant bonne sorte,

Que quiconque l[’]oyt (& l’orra)

Dit, c[’]est une autre Pandora.

Madamoiselle est ce raison

De tenir les gens en prison,

Et puis apres se railler d[’]eulx ?

Sainct Iean si i[’]estois l[’]un des deux,

Ie trouuerois bien la maniere

De vous tenir ma prisonniere.

Croyez que ie m[’]en vengerois :

Et quelque chose vous ferois.

Dame, que peult le cueur nostre,

Qui est vostre,

Pour estreines vous donner ?

Fors à vous se redonner :

Non à autre ?

Le vert boucquet de belles violettes

Si bien troußé, si gay, si façonné,

Que l[’]autre hyer pris entre ses mammelettes,

Ma doulce amour, tel soulas ma donné,

Tel grand plaisir, dont suis enuironné,

Que iour & nuict luy fay recueil, & feste.

Le iour cent fois à le baiser m[’]arreste :

La nuict le metz dessus mon trauersain.

Puis quand me prent quelque mal à la teste,

I[’]espere en toy, car il vient de ton sein.

Ie ne veulx plus mes yeulx repaistre,

A contempler la beaulté d’ame :

Car quand voy ma maistresse, & Dame,

Ie voy tout ce qui en peult estre.

C[’]est vn grand bien certes que d[’]estre à soy :

Mais plus grand bien, amye, d[’]estre à toy

Qui est à soy, il ne iouyt de rien :

Qui est à toy, il iouyt dun grand bien.

Je m[’]esbahy, Madamoiselle,

Qu’à ceulx qui veulent vostre bien,

Et qui vous ayment de bon zele,

Ne vous laissez toucher en rien.

Mais vous laissez taster tresbien

A ceulx qui vostre mal desirent :

Qui vous troublent, faschent, detirent.

Voilà, la fieure vous embrasse,

Et estraint fort : ce qu[’]onc ne feirent,

Ceulx qui desirent vostre grace.

Pleust à Dieu que seulement fusse

Fieure trois iours : je vous ferois

Autant de tours qu[’]onques feit pulce,

Sur vostre corps, ou ie serois.

De vous (croyez) me vengerois :

Sur vous n[’]auroit ne nerf ne veine,

Que ie ne misse en grosse alaine.

Et (qui ne vous ose toucher

En tout honneur) vous faisant peine,

Ie viendrois avec vous coucher.

Vostre beaulté est si extreme,

Que ie ne puis l[’]estrener, si

Ce n[’]estoit que fusse moymesme

L[’]estreneur, & l[’]estreine außi.

Ie te sçay tant de grace auoir,

Que i[’]ayme mieulx cent fois te veoir,

Que ie ne fay mon propre cueur.

Penses tu que ie sois moqueur ?

Vn païsant de la champaigne,

Ayant vne vachere belle,

Si fort l[’]ayma que sa compaigne

La veult faire, & monter sur elle.

Son occasion estoit telle,

Que sa femme estoit acouchee.

La garse non effarouchee

Le remect loing : vn veau luy baille.

S’elle eust esté par luy touchee,

Deux en eust eu, diuers de taille.

Vous estonnez vous si L[’]yuer

Ne se peult au monde trouuer ?

Au monde ne se trouue mye,

Il se tient au cueur de m[’]amye.

Qui l[’]yuer vouldra recouurer,

En Ianvier ne le peult trouuer :

En Ianvier ne le quiere mye :

Mais le quiere au cueur de m[’]amye.

Ce liure je vous enuoye

N[’]est à la court moins estimé,

Que celuy qui se mect en voye

Est de vostre cueur bien aymé :

Amadis de Gaule est nommé,

Qui fut preux aux amours, & armes :

Aussi vostre cueur bien armé

N[’]est sans amours, ny sans alarmes.

Catin veult que souuent la voye:

Que tousiours avec elle soye.

C[’]est adire que ie l[’]accolle.

Deuinez si Catin est folle ?

Ce moys de May mal gracieux,

Tant plein de uent, & de grand pluye :

Ce moys de May tant pluuieux,

Qui les oyseaux, & gens ennuye,

Rendant la saison endormye,

Sçais tu qu[’]il faict ? c[’]est chose aperte,

Qu[’]il va plorant de mon amye

Auec moy, l[’]absence, & la perte.

Bon amy quand ton œil verra

Dames sans grace, & sans beaulté,

Dy hardiment, Catin leur ha

Tout desrobé, & tout osté.

Quand ie suis pres tu te retires,

Quand ie suis loing adonc tu sors :

Voila comment tu me martyres,

Et puis d[’]esprit, & puis de corps.

Va t[’]en donc tout d[’]un train dehors,

Donne à mon corps allegement,

Ou à l[’]esprit contentement.

En temps & lieu, soit pres, ou loing

(Pour dire en vn mot rondement)

Ne sors point, ou sors au besoing.

Toutes les nuictz quand me resueille,

Amour me faict en vous penser :

Mon petit cueur sans cesse y veille.

Vueillez le donc recompenser.

Quel plaisir selon nature est ce,

Qui apporte plus grand lyesse,

Qu[’]auoir continuellement

La Dame à son commandement ?

Que d[’]estre tousiours autour d[’]elle,

Parlant de l[’]œuure naturelle ?

Que deuiser de son amour,

Et la baiser cent fois de iour ?

O qu[’]il est heureux, & bien aise,

Qui sans cesser deuise, & baise !

Qui mil baisers n[’]estime exces,

Fuyant tout ennuy, tout proces,

Fuyant toute humaine follie,

Qui engendre melencolie.

Recommançant cent fois & mieulx,

Tout en despit des enuieux.

Et demenant heureuse vie,

Mal gré malle bouche, & enuie.

Mesprisant tous honneurs, & biens,

Fors ceulx que l[’]amour donne aux siens.

O de rechef, ô vie heureuse,

Seule vie, vie amoureuse !

O derechef qu[’]il est heureux,

Qui en ce poinct est amoureux !

Ie laisse courir benefices :

Je quicte ma part des offices,

Je desprise l[’]argent, & l[’]or,

Pour iouyr de si grand tresor.

Je dy plus : ie mesprise mesme,

Sceptre, couronne, diadesme,

Du grand Iuppiter immortel,

Si en amour puis estre tel.

Quel plaisir selon nature est ce,

Qui apporte plus grand lyesse,

Qu[’]avoir continuellement

La Dame à son commandement ?

Petit ennuy qui est mal sade,

Tout soubdain rend Anne malade :

Puis tost quelque mousche soubdaine,

Vous rend Anne bien gaye, & saine.

Tantost au lict, ou en la chambre,

La verrez vaine de tout membre.

Tantost en bouticque, ou en rue,

La verrez saine, gaye, & drue.

Tantost crier, tantost besler,

Tantost venir, tantost aller,

Tantost pleurer, & tantost rire,

Tantost iaser, & tantost lire.

Tantost aller aux champs s[’]esbattre,

Faisant la folle plus que quatre :

Tantost d[’]estomach flumatique :

Tantost de teste fantastique :

Tantost crier le costé dextre :

Helas allez querir le prebstre.

Tantost blesme, & tantost vermeille :

Brief c[’]est la femme nompareille,

Qui se maintient de telle sorte :

Tantost est viue, & tantost morte.

Mais le prouerbe accomplit elle,

Lequel dit que la femme est telle :

Femme se plaint, femme se deult :

Femme est malade quand el’ veult :

Elle ha iuré saincte Marie,

Quand elle veult est guerie.

O doncques ( Anne) par ce poinct

De toy ie ne m[’]esbahy point.

Ie sçay qu[’]entre mes petis chantz

Du livret d[’]amour non delivre ;

Qu[’]a ce beau May ie te deliure,

Comme d[’]herbes dessus les champs,

Trouueras vers bons, & meschantz.

Mais autrement faict on vn livre ?

CE moys qui ha de L[’]annee l[’]honneur,

Prenant son nom de la mere à Mercure,

Ce Moys tant plain de grace, & de bon heur,

Qu[’]a tout esprit toute ioye procure,

Ce Moys duquel zephyrus à pris cure,

Ce Moys qui faict rire les gens, & champs,

Te veult offrir de ma Muse les chantz :

Non pas les chantz du messager des Dieux.

O vray Mercure, à le prendre en bon sens,

Excuse moy, ta Muse chante mieulx.