L'Euangeliste saint Matthieu

Estant Ebrieu de nacion,

Escriuit außi en Ebrieu

(Premier de tous) du filz de Dieu

L'humaine generacion,

Vie, Mort, Resurreccion.

Saint Marc de saint Pierre interprete,

De qui la doctrine ha suiuie,

Par son Euangile, en brief, traite

De mainte chose dite & faite

Par Iesuchrit le fruit de vie,

Le preschant en Alexandrie.

Saint Luc Medecin, ha escrit

Selon qu'il auoit ouy dire

Aus Apotres: & ha descrit

La vie & faits de Iesuchrit:

Mais les Actes voulut escrire,

Selon qu'il vit, pour nous instruire.

Saint Ian escriuit le dernier

L'Euangile tant hautement

Que Iesuchrit l'a pour premier

De ses aymez, & coutumier

De reposer heureusement

Au sein d'icelui priuément.

[5]S. Luc ii.

L'Ange predit à Zacharie

(Offrant encens à la maniere

Et Loy des Iuifs) que Dieu qu'il prie,

L'exauce: mais comme il varie

Estant douteus de sa priere,

Soudein perd la parole entiere.

[6]S. Luc i.

L'Ange fut transmis deuers celle

Trespure vierge en innocence,

Qui est seule Mere & pucelle,

Pour annoncer la grand' nouuelle,

Que Filz Dieu, grand en puissance

Prendroit en elle humaine essence.

[7]S. Luc i.

La Tressainte vierge Marie

Diligemment se met en voye,

Vers la maison de Zacharie,

Si que sa cousine, & amie,

De saint Ian enceinte, elle voye,

Qui en l'oyant saute de ioye.

[8]S. Matth. ii. S. Luc ii.

En Betleem IESVS fut né.

En vne creiche pourement

Comme auoit esté ordonné

Au saint conseil sur ce donné

Là sus au ciel diuinement,

Et predit anciennement.

[9]S. Luc ii.

L'Ange fait sauoir la naissance

De Iesuchrit aus Pastoureaus:

Puis vont souz foy & grand' fiance,

En Betleem, pour l'asseurance.

Et laissent de nuict leurs troupeaus

Leurs moutons, brebis, & agneaus.

[10]S. Matthieu ii.

Les sages Rois s'en vindrent droit

D'Orient adorer Iesvs:

Si entrerent souz petit toict,

Quand virent l'estoile à l[']endroit

S'arrester tout droit au dessus,

Pour les garder d'estre deceuz.

[11]S. Luc ii.

Iesvs au Temple presenté,

Es bras de Symeon receu,

Rendit Symeon contenté,

Pour le Salut representé,

Et deuant ses yeux apperceu,

Qu'en son esprit auoit conceu.

[12]S. Matthieu ii.

Herode occit les Innocens,

Pensant Iesvs occire:

En ce point maints Tyrans puissans

Auecques tout leur humain sens

Soit par conseil, ou cruelle ire,

Au fait de Dieu n'ont onq peu nuire.

[13]S. Matthieu ii.

Ioseph auerti par vn Ange

De prendre en Egypte la fuite,

Incontinent de païs change,

Et s'en va en la terre estrange,

Que l'on nomme encores Egypte,

Craignant du Roy l'ire despite.

[14]S. Matth. iii. S. Marc i.
S. Ian i.

Saint Ian Batiste batiza

Iesuschrist au fleuue Iordain

Mais parauant il s'excusa

Et puis apres il auisa

Sus le Sauueur descendre à plein

Le saint Esprit de grace plein.

[15]S. Ian i.

Saint Ian Batiste Precurseur,

Lequel ne batizoit qu'en eau,

Voyant marcher notre Signeur,

Luy porta vn si grand honneur

Qu'il dist de luy ce mot tant beau,

Voicy venir de Dieu l'Agneau.

[16]S. Matth. iiii S. Marc i.
S. Luc iiii.

Satanau desert le tenta

Disant qu'il fist de pierre pain:

Puis sus le Temple le porta:

Puis sus vn mont il le monta:

Mais Satan de cautelle plein

Le tenta par trois fois en vain.

[17]S. Ian ii.

Iesuchrist estant inuité

Aux noces d'ami, ou cousin,

Voyant le vin neceßité,

Fit par sa sainte autorité,

Et par beau miracle diuin,

Transmuer l'eau en tresbon vin.

[18]S. Ian iiii.

Iesuchrist qui est la fontaine

D'eau de vie diuinement,

Demande à la Samaritaine

A boire, non d'une eau mondaine,

Comme el' pensoit premierement:

Puis il l'instruit bien hautement.

[19]S. Matth. xiii. S. Marc vi.
S. Luc iiii.

En Nazaret entra au Temple

(Synagogue, & des Iuifs l'Eglise)

Ou le Peuple qui le contemple

Entend de luy sauoir si ample

Qu'incontinent s'en scandalize,

Et pour ses parens le mesprise.

[20]S. Luc v.

Iesus au bateau de saint Pierre

Les tourbes & le peuple presche

Qui estoient sus la riue à terre:

Puis dit que la rets on desserre,

Et que de pescher on s'empesche:

La rets ront des poissons qu'on pesche.

[21]S. Matth. viii. S. Luc v.

Entre les miracles auint

Qu'un homme ladre s'approcha,

Et tout droit à Iesuchrist vint:

Puis tout sain, & gueri deuint

Si tot que Iesvs le toucha,

Qui sa ladrerie secha.

[22]S. Matth. xii S. Marc ii.
S. Luc vi.

Les Apotres, qui auoient faim,

Le iour du Sabbat arrachoient

Espiz de blé avec la main:

Mais les Iuifs de cœur inhumain

De celà bien fort se fachoient,

Et à Iesuchrist s'attachoient,

Qui reprint leur abus à plein.

[23]S. Matth. v. S. Luc vi.

Iesus ses Apotres preschant

Dit les vrays poures bieneureux,

Les humbles & les douloureux,

Ceux que chacun va reprochant,

Et que le Monde hayt, touchant

Le Nom de Dieu porté par eux.

[24]S. Matth. vii. S. Luc vi.

Iesus blasme ainsi l'ypocrite

Qui dessus soy n'auise rien:

Comment peux tu, & qui t'incite

De voir vne paille petite

En l'œil d'autruy? qui ne peux bien

Voir vne grosse busche au tien?

[25]S. Matth. viii. S. Luc vii
S. Ian iiii.

Un Centenier tout triste & blesme

Le pria pour son filz transi:

Iesus voyant la Foy extreme

Le guerist tout à l'heure mesme:

Puis dist qu'en Israël außi

Ne vit Foy telle à celle cy.

[26]S. Matth. xiii. S. Marc iiii.
S. Luc viii.

L'oiseau qui mange la semence

A cil qui seme par la voye,

C'est le malin, plein de nuisance,

Qui vient dens notre conscience

Rauir, tout ainsi qu'une proye,

Le pur grain de doctrine vraye.

[27]S. Matth. viii. S. Marc iiii.
S. Luc viii.

Iesus dormant en la nauire,

Un grand vent se leue si fort,

Qu'il vous la trouble, & vous la vire,

Et la singe comme par ire:

Mais luy esueillé, met d'accord

Le vent & mer pleins de discord.

[28]S. Matthieu xiiii.

Iesuchrist cheminant sus l'eau

Fait qu'on s'estonne & soupeçonne:

Saint Pierre sortant du bateau,

Sus l'eau chemine, bien & beau:

Puis vn vent l'endrondre, & l'estonne:

Mais Iesuchrist sa main luy donne.

[29]S. Matth. xv. S. Marc vii.

Perseuerant la Cananee

Prier pour sa fille captiue

Du faux Esprit, & malmenee,

Sa grand' priere enracinee

En vraye Foy, ardente, & viue,

Fait que la fille à repos viue.

[30]S. Matth. xv. S. Marc viii.

Grand peuple par trois iours entiers

Suiuoit Iesuchrist par les chams:

De sept pains (restans maints quartiers)

Il en repeut quatre milliers,

Voire tant seulement des grans,

Sans les femmes, & les enfans.

[31]S. Ian viii.

Les Iuifs meinent à Iesuchrit

La femme en adultere prise:

Car s'il pardonne le delict,

C'est contre la Loy de Moïse:

Mais luy, qui leur malice auise,

De son doy en la terre escrit:

Puis s'en vont tous, confuz d'esprit.

[32]S. Matth. xvii. S. Marc ix.
& aussi S. Luc ix.

Au mont montra sa majesté

Deuant saint Ian, Iaques & Pierre,

Moïse y fut representé,

Et Elie d'autre costé,

Disans qu'en Iudaïque terre

Il soutiendroit mortelle guerre.

[33]S. Matth. xiii. S. Marc ix.

Iesus vn enfant appela,

Pour oster les siens de souci,

Et du doute qui les troubla:

Puis dist qu'aux cieux est cetuy là

Le plus grand, qui est tout ainsi

Que ce petit enfant icy.

[34]S. Luc x.

Iesuchrist disoit, pour connoitre

Celuy qui est notre prochain,

L'homme nauré n'a onq peu estre

Secouru du Iudaïq Prestre,

Ny du Leuite, ains d'un certain

Homme estranger, Samaritain.

[35]S. Luc xv.

L'enfant prodigue delaissa

Son pere, pour mieux paillarder:

Puis la famine le pressa:

Lors à son pere s'adressa

Pour pardon luy en demander,

Qui le festin fit commander.

[36]S. Luc xvi.

Le riche, nourri & vestu

En tout delectation

Voyant le Lazare abbatu,

Foible, malade, & sans vertu,

Ne luy donne refection:

Les chiens en ont compaßion.

[37]S. Ian x.

Les peruers Iuifs tout en commun

Vous enuironnent Iesuchrist,

Luy disans que sans doute aucun

Il declaire s'il est le Christ:

Il respond, comme il est escrit,

Mon Pere & moy ne sommes qu'un:

Lors chacun d'eux des pierres prit.

[38]S. Ian xi.

A prïere & pleurs s'excita,

Si que tremeur s'en est suiuie:

Puis le Lazare suscita,

Que Mort dens le tombeau ietta:

Mais luy, rendant au mort la vie,

Accreut sur soy des Iuifs l'enuie.

[39]S Matth. xxi. S. Marc xi.
S. Luc xix.

Iesuchrist, monté sus l'asnesse,

Dedens Ierusalem entra:

Luy contraire à toute hautesse,

Et à toute humaine sagesse,

Son humilité demontra

Quand en tel estat se montra.

[40]S. Matth. xxi. S. Marc xi.
S. Luc ix. S. Ian ii.

Iesuchrist chassa les marchans

Qui faisoient leur trafique au Temple,

Gros vsuriers, & gens méchans,

Aux biens mondains tousiours tachans,

Qui souz ombre de bon exemple

Tenaient banque, & avarice ample.

[41]S. Matth. xxii. S. Marc xii.
S. Luc xx.

Les faux mouchars Pharisiens

Cuidans bien Iesuchrist surprendre

Avec aucuns Herodiens

Enuoyez par les Anciens,

L'interroguerent, pour contendre,

S'il faut à Cesar tribut rendre.

[42]S. Matth. xxvi. S. Marc xiiii.
S. Ian xii.

Sus le Sauueur,, la Magdeleine

Espandant onguent precieux

Rendit la maison toute pleine

De bonne odeur, tant souueraine

Que Iudas le sedicieux

Murmura, comme auaricieux.

[43]S. Ian xiii.

Iesus second en Trinité

Laua aux Apotres les piez,

Montrant à toute autorité

Le droit chemin d'humilité:

Et apres qu'il les eut lauez

Encor les a il essuyez.

[44] La passion
S. Matth. xxvi. S. Marc xiiii.
S. Luc xxii. S. Ian xiii.

A ses Apotres il disoit

Que d'un d'entr'eux seroit trahi:

Puis comme saint Ian reposoit

En son sein, il luy exposoit

Qui seroit celuy tant haï

Qui rendoit chacun ébahi.

[45]S. Matth. xxvi. S. Marc xiiii.
S. Luc xxii.

Au mont d'Oliuet il pria

De ne boire ce dur calice:

Mais quand son Pere il supplia,

Cecy accordé ne luy a:

Car luy offert en sacrifice,

Deuoit purger notre malice.

[46]S. Matth. xxvi. S. Marc xiiii.
S. Luc xxii. S. Ian xvii.

Souz vn baiser en trahison

Iesuchrist fut liuré, & pris:

(C'estoit le miel sus la poison,

Et la feintise en l'oraison:)

Iudas n'en receut pour son pris

Que trente denirs, tout compris.

[47]S. Matth. xxvi. S. Marc xiiii.

Caïphe ardent, & despité

Sus la response douce & sage

Du Sauueur de l'humanité,

Se montre si fort irrité

Que quasi tout vif il enrage,

Déchirant ses habits, par rage.

[48]S. Matth. xxvii. S. Marc xv.
S. Luc xxiii. S. Ian xviii.

L'enuie auec l'ambition

Des faux Iuifs, nation ingrate,

Pleine d'abus, d'extorsion,

D'erreur, & vindication

Enuoye Iesvs vers Pilate,

Qui mal n'y trouve, & ne les flate.

[49]S. Matth. xxvii. S. Marc xv.
S. Ian xix.

Iesuchrist en la Preuoté,

Comme Pilate commandoit,

Par Satellites fut foyté,

Moqué, frappé, & bufeté:

Pilate, qui les Iuifs sondoit,

Leur rage adoucir pretendoit.

[50]S. Matth. xxvii. S. Marc xv.
S. Ian xix.

Iesus d'espines coronné,

Endura vn tresgrief tourment

Que n'auoit Pilate ordonné,

Mais maint Satellite adonné

A tout mal faire grandement,

Surpassa le commandement.

[51]S. Ian xix.

Pilate aux cruels Iuifs montroit

Iesuchrist (disant voicy l'homme>

D'espines coronné estoit,

Et vn manteau rouge portoit:

Lors la commune voix en somme

A mourir, par leur Loy, le somme.

[52]S. Luc xxiii.

Portant sa crois sans nul esmoy,

Aux femmes pleurans dist ainsi:

Ne pleingnez, ny pleurez sus moy:

S'on fait tel cas, & tel defroy

Au bois verd (à moy que voicy)

Au boit mort que fait l[']on außi?

[53]S. Matth xxvii. S. Marc xv.
S. Luc xxiii. S. Ian xix.

Iesuchrist en crois estendu,

Mourut pour nous viuifier:

Son corps cloué, tiré, tendu,

Et son sang pour nous espandu,

Sont les armes pour deffier

Peché, la Mort, l'ennemi fier.

[54] La resvrrection.
S. Matth. xxviii. S. Marc xvi.
S. Luc xxiiii. S. Ian xx.

Iesuchrist est resuscité

Malgré la mort, malgré l'enuie

Usant de sa diuinité:

Et, ce faisant, a excité

Notre ame de terre rauie

En l'amour de celeste vie.

[55]S. Matth. xxviii. S. Marc xvi.

Les trois Maries douloureuses

De grand matin vont au tombeau,

Par affections merueilleuses

Portans ointures precieuses

Pour oindre le corps saint & beau:

Mais voyent l'Ange en iouuenceau,

Qui leur dit nouuelles ioyeuses.

[56]S. Ian xx.

Magdeleine de desir pleine

S'en va son bon maistre chercher

Dens le tombeau, & avec peine:

Lors, en Iardinier, sa voix pleine

Elle entend, & veut approcher:

Mais il defend de le toucher.

[57]S. Marc xvi. S. Luc xxiii.

De Ierusalem s'en partirent

Deux des siens, allans en Emaus:

Lors, sans le connoitre, le virent,

Et si entr'eux maints propos dirent

Touchant ses tourmens, & grans maux:

Puis leur remontra des points hauts:

En fin de veuë le perdirent.

[58]S. Ian xx.

Saint Thomas ne voulut point croire

Par ouir dire, mais par voir:

Son incrédulité notoire

Est escrite en la sainte histoire,

Pour confirmer notre deuoir

De croire, sans veuë en auoir.

[59] Des actes des apotres.
Actes i.

Deuant les Disciples aux cieux

Iesuchrist victorieux monte,

Laissant ce Monde vicieux

Pour retourner en ces saints lieux:

Puis viendra, en descente pronte

Pour nous faire à tous rendre conte.

[60]Actes iii.

Saint Pierre d'argent n'ayant point

Pour faire à vn boiteux aumone,

Guerit ce boiteux mal en poinct,

Au nom Iesvs: & en ce poinct,

Pour vne aumone trop plus bonne,

Au lieu d'argent, santé luy donne.

[61]Actes vii.

Saint Estienne fut lapidé

Invoquant le nom de Iesvs:

Ainsi Iesvs luy ha aydé:

Car luy Martir ha regardé

De l'œil de Foy aux cieux là fus,

Et ha veu Iesvs au dessus.

[62]Actes viii.

De la Royne d'Ethiopie

L'Eunuque, bien grand personnage,

En son char lisant Isaie,

Trouve saint Philippe, & le prie

Luy faire entendre le passage,

Puis le batizer, dauantage.

[63]Actes ix.

Saint Paul brulant d'affeccion

A persecuter les Chretiens,

Fut fait vaisseau d'eleccion

Par vne grand' conuersion:

Ceux qu'il souloit mettre es liens,

Lors il ayma plus que les siens.

[64]Actes x.

Les animaux de main forte

A saint Pierre offerts à manger,

C'est la vision qui l'enhorte

Que Dieu ne veut clore la porte

De salut, à nul estranger

Qui à la Foy se veut renger.

[65]Actes xii.

Saint Pierre pris, & enferré,

Et endormi entre sa garde

En prison, ayant l'huis serré,

Fut deliuré, & defferré

Par vn saint Ange qui le garde,

Et qui le conduire ne tarde.

[66]Actes xiiii.

Saint Paul qui vn boiteux guerit,

N'en veut receuoir sacrifice:

Ains il deschire son habit

Comme par ire, & par despit

De tel abus, & de tel vice,

De tel erreur, & faux seruice.

[67]Actes xvi.

L'esprit deuin d'une chambriere

Louoit saint Paul, qui pour bon eur

N'auoit la façon coutumiere

De telle louenge planiere:

Parquoy n'acceptant tel honneur,

Fit sortir l'Esprit deuineur.

[68]Actes xx

Un enfant endormi, & las,

Tombant de nuict du tiers estage,

Du haut d'une fenestre à bas,

Se rompit le col, & les bras:

Lors saint Paul traitãt maint passage

Resuscita ce personnage.

[69]Actes xviii.

Saint Paul eschappé du naufrage

Dedens vne Isle s'arresta:

Print des sarmens pour le chaufage,

D'où saillit vn Serpent sauuage,

Qui, mordant sa main, l'adenta:

Mais sans mal, au feu le guetta.

FIN.

[70]

Lors que saint Ian en Patmos exiloit

Pour la parole, à laquelle souloit

Rendre en tous lieux assuré témoignage:

Uid en esprit des Saints l'affliccion,

Uid les malheurs, vid l'execracion,

Qu'excercer doit l'Antechrit par sa rage.

[71]Apocal. i

Saint Ian vid tout premierement

Iesus en long acoutrement:

Sept estoiles en sa main dextre,

Sept chandeliers d'or il vid estre

Autour de luy: disant, premier

Ie suis, & außi le dernier,

[72]Apocal. iiii.

En vne apparence terrible

Se fait cy le Sauueur visible:

Quatre animaux tous remplis d'yeux

Chantent la gloire au Dieu des Dieus.

Uingtquatre vieillars y consentent

Et leurs couronnes luy presentent.

[73]Apocal. vi.

Un Roy dessus vn blanc cheual

Tient l'arc bendé pour faire mal:

Un homme sur vn cheual roux

Tient l'espee nue en courroux:

L'autre vient sur vn cheual noir,

Puis Mort, & l'infernal manoir.

[74]Apocal. vi.

Les ames des saints Martirs crient

Dessous l'autel: & Dieu supplient

Qu'il venge leur sang innocent:

Si leur respond le Toutpuissant

Qu'ils reposent, & soient recors

D'attendre vn peu tous leurs confors.

[75]Apocal. vi.

La terre fait grand tremblement:

Le Soleil noir difformement,

La Lune appert toute sanglante:

Mainte estoile est du ciel tombante:

Et isle, & mont de place change:

Chacun creint fort tel cas estrange.

[76]Apocal. vii.

Quatre Anges aux coings de la terre

Les quatre vents tiennent en ferre:

Un autre vers soleil leuant,

Portant signe du Dieu viuant,

Dit qu'il faut marquer au milieu

Du front, les seruiteurs de Dieu.

[77]Apocal. viii.

Sept Anges deuant Dieu estans

Sept trompettes sont acceptans:

L'huitieme tient l'encensier d'or,

Et dessus l'autel d'or encor

Presente deuant le haut tróne

L'oraison des Saints, & l'aumóne.

[78]Apocal. viii.

L'Ange premier, premier entonne

Sa trompette: puis, comme il sonne,

La grelle & feu de sang mellé

Miserablement ha brulé

De la terre la tierce part:

Tant d'horreur ce grand son depart.

[79]Apocal. viii.

Apres sonne l'Ange second:

Et voici vn grand ardent mont

Dedens la mer se gette & rue:

La tierce part d'elle se mue

En sang: & tost sont ruïnez

Cent mil poissons, & plusieurs nefs.

[80]Apocal. viii.

L'Ange tiers sonne: & vne grand'

Estoile ardant' tombe, & se rend

Dedens la tierce part des eaux:

Dont des riuieres & ruisseaux

La tierce part amere est faite.

L[']on meurt buuant telle eau' infette.

[81]Apocal. viii.

Puis vient sonner l'Ange quatrieme,

Lors du Soleil la part troisieme,

Des estoiles, & de la Lune

Est obscurcie, & deuient brune,

D'un autre Ange on entend la voix,

Criant malheur, malheur trois fois.

[82]Apocal. ix.

L'Ange cinquieme sonne: & puis

Une estoile tombe au grand puits

Infernal, dont des bestes sortent

(Qui malheur aux hommes apportent

Durant cinq mois) auec fumee

Comme de fournaise enflammee.

[83]Apocal. ix.

Le sixieme Ange vient sonner,

Et puissance à quatre donner

D'occir la tierce part des gens:

Puis gens armez sont diligens

A nuire, sur bestes montez

Comme Lyons fiers indomptez,

[84]Apocal. x.

Un Ange du ciel descendant

En sa face clarté rendant

Comme vn Soleil, ses iambes plante

(Comme double colonne ardante)

L'une en la terre, & l'autre en l'eau:

En sa main tient vn liure beau.

[85]Apocal. xi

Deux Prophetes, de sacs vétus

Preschent le grand Dieu des vertus:

La beste d'enfer leur fait guerre,

Et les tue tous deux sur terre:

Mais Dieu la vie leur redonne:

Alors tout le monde s'estonne.

[86]Apocal. xii

Grand' Dame du Soleil vétue

Contre vn grand dragon s'euertue,

Le fils de la Dame au ciel monte:

Saint Michel la beste surmonte,

Si qu'el' ne fait nuisance aucune:

La Dame ha sous ses piez la Lune.

[87]Apocal. xiii.

De la mer sort beste à sept testes

Disant blasphemes deshonnestes,

Et guerroyant tresfort le Monde

Pour le rendre serf & immonde:

Des habitans du ciel mesdit,

Et rien sinon que tout mal dit.

[88]Apocal. xiiii.

Un Agneau au mont de Sion

Des gens de benediccion

Enuironné, se montre ici.

Puis vn Ange qui dit ainsi

Craingnez, & si veuillez aymer

Dieu qui ha fait ciel, terre, & mer.

[89]Apocal. xiiii.

Sus vne belle & blanche Nue

Se met le fils de l'homme en vuë,

Tenant vne faux pour faucher

La moisson qu'on voit ia secher.

L'Ange moissonne: & vn autre Ange

Uendange, & foule la vendange.

[90]Apocal. xv. & xvi.

Sept Anges sept fioles tiennent

Lesquelles espancher ils viennent

En terre, en mer, & en l'Eufrate

Contre la nacion ingrate,

Qui son Dieu ne veut reconnoitre,

Ny humble & obeïssante estre.

[91]Apocal. xvii.

Une grand' Dame hautement

Paree en riche acoutrement,

Et montee sur beste horrible,

Presente ici le vin nuisible

Dens vne coupe d'or luisant

Les plus grans à boire induisant.

[92]Apocal. xviii.

Un Ange lumineux descend

Et predit des maux plus de cent

Sur la cité de Babilon:

Chacun s'estonne, & ne scet l[']on

Qu'elle contenance tenir

Pour l'horreur des maux auenir.

[93]Apocal. xix.

Le Iuste sur vn blanc cheual

Combat, & fait descendre à val

La Beste, & les Grans de la terre:

Puis les oiseaux volans grand' erre

Sont inuitez d'un Ange cler

Qui vient dens le Soleil parler.

[94]Apocal. xx.

Un Ange vous lie & encheine

Le grand Serpent d'une grand' cheine,

Et puis dens l'abime l'enferme:

Ou, là dedens, il tiendra ferme:

Par mil ans: & puis sortira,

Et pour quelque tems il nuira,

[95]Apocal. xx.

Le grand Serpent est deffermé,

Et assemblant meint homme armé

Uous vient faire dessus la terre

Aux saints esluz de Dieu la guerre:

Puis chet en l'abime profonde:

Dieu, aux euures iuge le monde.

[96]Apocal. xxi.

Saint Ian d'un saint Ange leué,

Cette sa vuë, & ha trouué

Que Ierusalem estoit belle

Comme cité toute nouuelle,

Descendant du Ciel, radieuse

Comme la pierre precieuse.